RF-niň kompaniýalary Türkmenistanyň bazaryny geljegi uly bazarlaryň biri hasaplaýarlar
Rus kompaniýalary Türkmenistanyň bazaryny geljegi uly bazarlaryň biri hasaplaýarlar diýip, RF-niň senagat we söwda minsitri Alekseý Gruzdew penşenbe güni Aşgabatda geçirilen Türkmen-rus işewürlik forumynda aýtdy.
Ol ikitaraplaýyn haryt dolanyşygynyň 60%-den gowragynyň iki ýurduň senagat ulgamlarynyň – metallurgiýa, maşyngurluşyk we himiýa senagatynyň önümlerinden ybaratdygyny belledi.
“Rus kompaniýalary Türkmenistanyň bazarynda işlemäge uly gyzyklanmalaryny görkezýärler we ony geljegi örän uly bazarlaryň biri diýip esasly hasaplaýarlar” diýip, RF-niň senagat we söwda ministriniň orunbasary nygtady.
Ol rus kompaniýalarynyň türkmen bazarynda işlemäge toplumlaýyn çemeleşýändiklerini hem-de tehnikalary we enjamlary ibermekden başga-da, hyzmat ediş, işgärleri taýýarlamak meselelerine we beýlekilere üns berýändiklerini belledi. Gruzdew mysal hökmünde bu ýerde diňe bir ulanylyş ulgamyny däl, eýsem, awtoulaglary bejermek we olara hyzmat etmek boýunça ulgamy-da ösdürýän “Kamazyň” alyp barýan işini mysal getirdi.
“Biz, gürrüňsiz suratda, has düýpli önümçilik kooperasiýasyna ymtylýarys, türkmen hyzmatdaşlarymyz bilen başarnyklarymyz we tejribelerimiz bilen paýlaşmaga taýýardyrys. Şunda metallurgiýa, himiýa senagaty hem-de hyzmatdaşlyk nukdaýnazaryndan täze ugur bolan raýat gämigurluşygy biziň üns merkezimizdedir” diýip, ministriň orunbasary sözüniň üstüni ýetirdi.
2022-nji ýylyň 7-nji dekabrynda “Balkan” gämigurluşyk we gämi abatlaýyş zawody” (Türkmenistan) açyk görnüşli paýdarlar jemgyýeti bilen “Ak Bars” Birleşen senagat korporasiýasy” (Tatarystan Respublikasy, Russiýa Federasiýasy) paýdarlar jemgyýetiniň arasynda gury ýük daşaýan/konteýner daşaýan gämileri bilelikde gurmak boýunça hyzmatdaşlyk etmek hakynda Ylalaşyga gol çekildi.
2009-njy ýyldan 2020-nji ýyl aralygynda Türkmenistanyň Milli deňiz floty üçin Russiýa Federasiýasynyň gämigurluşyk zawodlarynda jemi nebit guýulýan gämileriň 6-sy hem-de ýokary tizlikli ýolagçy gämileriniň 2-si guruldy we satyn alyndy.
ORIENT news
