Türkmenistan yslam ýurtlarynyň hokkeýi ösdürmek boýunça Assosiasiýasynyň bilelikdäki esaslandyryjysy boldy
Türkmenistan yslam ýurtlarynyň hokkeýi ösdürmek boýunça Assosiasiýasynyň bilelikdäki esaslandyryjysy boldy. Guramany esaslandyrmak baradaky ylalaşyga yslam ýurtlarynyň Kazanda geçen birinji hokkeý ýaryşyna gatnaşan 13 ýurduň wekilleri tarapyndan gol çekildi – diýip, Tatarystanyň Sport baradaky ministrliginiň saýty habar berdi.
Assosiýasynyň esaslandyryjylary bolup Türkmenistanyň, BAE-niň, Saud Arabystanyň, Marokkonyň, Alžiriň, Omanyň, Bahreýniň, Eýranyň, Mongoliýanyň, Özbegistanyň, Gyrgyzystanyň, Gazagystanyň, Türkiýäniň, şeýle hem Tatarystan Respublikasynyň Hokkeý federasiýalarynyň baştutanlary boldular.
Guramanyň maksady – Aziýa, Ýakyn Gündogar we Afrika sebitlerinde hokkeýi ösdürmekdir. Bu hyzmatdaşlyk ýurtlara rus hokkeýiniň tejribesini öwrenmäge, oýunçylary, türgenleri we eminleri okatmaga hem-de ýaş hokkeýçileri taýýarlamak usulyna elýeterliligi almaga mümkinçilik döreder.
Halkara Assosiasiýanyň başlygy Tatarystanyň Hokkeý federasiýasynyň, «Ak bars» hokkeý klubynyň prezidenti we «Tatneft» AGPJ-ň ýolbaşçysy Nail Maganow boldy. Halkara Assosiasiýanyň Aziýa sebiti boýunça wise-prezidenti edilip Gyrgyzystanyň Hokkeý federasiýasynyň baştutany Anwar Omorkanow, Ýakyn Gündogarda – BAE-niň Sportyň gyşky görnüşleri federasiýasynyň prezidenti Hamel al-Kubeýsi boldy. Bileleşigiň ştab-kwartirasy Kazanda ýerleşýär.
«Biziň baý hokkeý däplerimizi göz öňünde tutup, biz Tatarystanyň paýtagtynda Yslam hyzmatdaşlyk guramasynyň ýurtlaryny birleşdirýän ýene-de bir sport meýdançasynyň peýda bolandygyna örän şat. Bu ýaryşyň yslam ýurtlarynda hokkeýi ösdürmäge itergi berjekdigine ynanýaryn, ýurtlaryň we halklaryň arasynda dostlugyň pugtalanmagyna ýardam eder, Yslam hyzmatdaşlyk guramasynyň taryhynda ýene-de bir ýagty sport sahypasy bolar» – diýip, Tatarystan Respublikasynyň Prezidenti Rustam Minnihanow Oýunlaryň ýapylyş dabarasyndaky çykyşynda belledi.
Ozal habar berlişi ýaly, ýaryşyň netijeleri boýunça Türkmenistanyň ýygyndysy bürünç medal gazandy.
ORIENT habarlar
