Türkmenistan bilen Özbegistan bilelikdäki çäreler bilen diplomatik gatnaşyklaryň 30 ýyllygyny bellärler
Türkmenistanyň Daşkentdäki ilçisi Ýazguly Mämmedow penşenbe güni Özbegistan Respublikasynyň Daşary işler ministriniň wezipesini ýerine ýetiriji Bahtiýor Saidow bilen duşuşdy.
Duşuşygyň dowamynda ikitaraplaýyn dostluk gatnaşyklarynyň, hoşniýetli goňşuçylyk we strategiki hyzmatdaşlygyň möhüm meselelerine garaldy. “Ýokary derejeli saparlaryň netijesinde gazanylan ylalaşyklaryň hemmetaraplaýyn durmuşa geçirilmegine aýratyn üns berildi” – diýlip, Özbegistan Respublikasynyň Daşary işler ministrliginiň saýtynda habar berilýär.
Söwda dolanyşygynyň görkezijilerini ýokarlandyrmak, söwda we senagat hyzmatdaşlygy ugurlarynda bilelikdäki taslamalaryň durmuşa geçirilmegini çaltlaşdyrmak üçin anyk teklipler ara alnyp maslahatlaşyldy. Söhbetdeşler iki ýurduň hem medeni we gumanitar gatnaşyklary güýçlendirmäge taýýardygyny tassykladylar.
Şeýle hem, diplomatlar ýurtlaryň arasynda diplomatik gatnaşyklaryň ýola goýulmagynyň 30 ýyllygynyň bellenilmeginiň çäklerinde bilelikdäki çäreleriň tertibi barada pikir alyşdylar.
Türkmenistan bilen Özbegistanyň arasyndaky diplomatik gatnaşyklar 1993-nji ýylyň 7-nji fewralynda resmi taýdan ýola goýuldy.
ORIENT news
