Serdar Berdimuhamedow Katar Döwletiniň Türkmenistandaky ilçisini kabul etdi
Serdar Berdimuhamedow Katar Döwletiniň Türkmenistanda täze bellenilen Adatdan daşary we Doly ygtyýarly ilçisi Hamad bin Raşid bin Hamad Al- Azbini kabul etdi.
Ilçi wagt tapyp kabul edendigi üçin hoşallyk bildirip, Hormatly Prezidentimize ynanç hatyny gowşurdy we Katar Döwletiniň Emiriniň mähirli salamyny ýetirdi. Şunda Katar tarapynyň Türkmenistan bilen däp bolan dostlukly gatnaşyklaryň mundan beýläk-de ösdürilmegine uly gyzyklanma bildirilýändigi bellenildi.
Serdar Berdimuhamedow hoşniýetli sözler üçin minnetdarlyk bildirip, dostlukly ýurduň doly ygtyýarly wekilini ýokary diplomatik wezipä bellenilmegi bilen gutlap, Katar Döwletiniň emirine iň gowy arzuwlaryny aýtdy.
Şeýlede Türkmenistanyň Doha şäherinde diplomatik wekilhanasyny açmak boýunça degişli işleriň geçirilýändigi bellenildi, munuň özi Türkmenistan bilen Katar Döwletiniň arasynda netijeli we uzakmöhletleýin hyzmatdaşlyga täze itergi berer.
Duşuşygyň barşynda Ýangyç-energetika toplumy, söwda, maýa goýumlar, ulag we aragatnaşyk, himiýa we dokma senagaty, oba hojalyk pudagy, saglygy goraýyş hem-de ýokary tehnologiýalar ulgamlary hyzmatdaşlygyň geljegi uly ugurlarynyň hatarynda kesgitlenildi.
