Türkmenistanyň Prezidenti Italiýa Respublikasynyň ilçisini kabul etdi
Türkmenistanyň Prezidenti Italiýa Respublikasynyň Türkmenistanda täze bellenen adatdan daşary we doly ygtyýarly ilçisi Luiji Ferrarini kabul etdi.
Diplomat wagt tapyp kabul edendigi üçin hoşallyk bildirip, Serdar Berdimuhamedowa ynanç hatyny gowşurdy we Italiýa Respublikasynyň Prezidentiniň salamyny ýetirdi.
Türkmenistanyň Prezidenti dostlukly ýurduň doly ygtyýarly wekilini bu ýokary diplomatik wezipä bellenmegi bilen gutlap, Italiýa Respublikasynyň Prezidentine iň gowy arzuwlaryny aýtdy.
Bellenilişi ýaly, Türkmenistan bilen uzak möhletleýin hyzmatdaşlygyň ösdürilmegi Italiýanyň daşary syýasatyna we umuman Ýewropa ýurtlarynyň bähbitlerine doly laýyk gelýär.
Şonuň bilen birlikde Türkmenistanyň Prezidenti iki tarapyň mümkinçiliklerini has giňden peýdalanyp boljakdygyny belledi. Ozaly bilen ýangyç-energetika, ulag, oba hojalyk we dokma senagaty ulgamlarynda bu mümkinçilikleriň işjeň herekete girizilmelidir. Şeýle hem türkmen we italýan halklarynyň arasynda medeni-ynsanperwer gatnaşyklary pugtalandyrmagyň möhümdigi bellenildi.
