Gazagystan Russiýanyň üsti bilen Germaniýa nebit iberip başlar
Gazagystan ilkinji 20 müň tonna nebiti Russiýanyň üsti bilen Germaniýa ugratmaga niýet edinýär – diýip, TASS Respublikanyň energetika ministri Bolat Akçulakowyň sözlerine salgylanyp,habar berýär.
Ministriň sözlerine görä, birinji tapgyrda 20 müň tonna iberiljekdigini, her ýylda bolsa 1,5 mln tonna çenli nebit bilen bu ýurduň üpjün ediljekdigini habar berdi. Şunda ol Gazagystanyň her ýylda Germaniýa 6-7 mln tonna töweregi nebiti iberip biljekdigini goşdy, Germaniýanyň zerurlyklary bolsa bu möçberlerden ýokarydyr.
Akçulakow şeýle hem Russiýanyň nebiti üstaşyr geçirmegiň mümkinçiligini tassyklamagyna garaşandygyny we dilden tassyklama alandygyny mälim etdi. Ozal Germaniýanyň Ykdysady işler we howany goramak ministrligi «Družba» nebit geçirijisi arkaly Şwedtdäki nebiti gaýtadan işleýän zawoda Gazagystandan nebitiň iberilip başlanmagyna garaşýandygyny habar beripdi.
ORIENT habarlar
Surat: unsplash.com
