Türkmenistanyň Prezidenti döwlet sapary bilen Hytaýa bardy
Türkmenistanyň Prezidenti Serdar Berdimuhamedow döwlet sapary bilen Hytaý Halk Respublikasyna bardy – diýip, TDH habar berýär. Döwlet baştutanynyň awialaýneri Pekiniň «Şoudu» halkara howa menziline gondy.
Türkmen lideriniň HHR-nyň başlygy Si Szinpin bilen duşuşygy ertire, 6-njy ýanwara bellenendir. Gepleşikleriň barşynda döwlet baştutanlarynyň hyzmatdaşlygy artdyrmagy, şol sanda ýangyç-energetika pudagynda hyzmatdaşlygy giňeltmek meselelerini ara alyp maslahatlaşmagyna garaşylýar.
Şeýle hem himiýa senagatynda, oba hojalygynda, söwda-ykdysady we ulag pudaklarynda türkmen-hytaý özara gatnaşyklary maslahatlaşmak hem meýilleşdirilýär.
Çarşenbe güni geçirilen Türkmenistanyň Ministrler Kabinetiniň mejlisinde saparyň dowamynda ikitaraplaýyn resminamalaryň toplumyna gol çekiljekdigi habar berlipdi. Umuman, HHR-na amala aşyrylýan şu gezekki sapar «köp ugurly türkmen-hytaý gatnaşyklarynyň mundan beýläk-de ösdürilmegine täze güýçli itergi bermelidir» – diýip, türkmen lideri Serdar Berdimuhamedow Hökümetiň mejlisinde belledi.
ORIENT habarlar
Surat: tdh.gov.tm
