Azerbaýjandan Ýewropa goşmaça tebigy gazy ibermegiň taslamasy bilen 3-nji fewralda tanyşdyrylar
Azerbaýjandan Ýewropa goşmaça gaz ibermegiň taslamasy 3-nji fewralda Günorta gaz geçelgesine gatnaşýan ýurtlaryň energetika ministrleriniň duşuşygynyň çäklerinde hödürlener – diýip, Bolgariýanyň Prezidenti Rumen Radewiň beýan edendigini «Interfaks» habar berýär.
«Bu taslama iň az serişdeler bilen we şol bada Azerbaýjandan Ýewropa tebigy gazyň goşmaça möçberlerini akdyrmaga başlamaga mümkinçilik berjek taslamadyr. Bolgariýanyň başlangyjy bilen bu taslama Rumyniýa, Wengriýa, Slowakiýa we Awstriýa goşuldylar» – diýip, Bolgariýanyň döwlet baştutany beýan etdi.
Öz gezeginde, Türkiýäniň energetika ministriniň baştutany Fatih Dönmez «Türkiýäniň Hazar deňziniň sebitinden bolsun, Ýakyn Gündogardan we Gündogar Ortaýer deňzinden bolsun, gaz üpjün etmekde goldaw bermäge taýýardygyny» beýan etdi.
Ýewropa tebigy gaz ibermegi giňeltmek baradaky gepleşikler Türkmenistanyň mawy ýangyjyň Ýewropanyň energiýa bazaryny üpjün etmegi diwersifikasiýalaşdyrmak üçin umumy ýewropa infrastrukturasyna baglanmagy baradaky meýilnamalary bilen utgaşdyrylýar.
ORIENT habarlar
Surat: dw.com
