Türkmen konserwatoriýasynyň mugallymy – halkara bäsleşiginiň ýeňijisi
Türkmen sungaty öwrenijisi Bahargül Ýakubowa Fussiýanyň Penza şäherinde her ýyl geçirilýän “Iň oňat ylmy-barlag işi -2022” halkara ylmy-barlag bäsleşiginiň ýeňijisi boldy. Onlarça, şol sanda GDA ýurtlaryndan alymlaryň, mugallymlaryň, aspirantlaryň, sungaty öwrenijileriň arasynda geçirilýän ylmy bäsleşigiň, hasap boýunça, 38-njisidir.
Bahargül Ýakubowa – Maýa Kulyýewa adyndaky Türkmen milli konserwatoriýasynyň uly mugallymy, “Sazyň taryhy” kafedrasynyň müdiridir. Ol öz işini dutar milli saz guralyna bagyşlady. Dutar bolsa 2021-nji ýylda ÝUNESKO-nyň Maddy däl medeni mirasynyň sanawuna girizildi.
Onuň “Dutar – türkmen halkynyň ruhy baýlygy” diýen işi “Sungaty öwreniş” tapgyrynda birinji orun eýeledi hem-de “Iň oňat ylmy-barlag işi -2022” atly XXXVIII halkara ylmy-barlag bäsleşiginiň çykyşlary boýunça düzülen ylmy işleriň ýygyndysyna giriziler.
Neşirde ylmyň häzirki zaman meselelerine hem-de dürli ugurlarda, şol sanda ynsanperwer ulgamda ylmy barlaglaryň netijeleriniň iş ýüzünde ulanylyşyna garalýar. Kitap, esasan, ylym ulgamynyň işgärleri, mugallymlar, aspirantlar, magistrantlar, talyplar üçin niýetlenendir. Makalalaryň doly mazmuny Elibrary.ru ylmy elektron kitaphanada açyk elýeterlilikde ýerleşdirilýär.
ORIENT news
