Serdar Berdimuhamedow Azerbaýjanyň Prezidenti Ylham Alyýewi 61 ýaşy bilen gutlady
Türkmenistanyň Prezidenti Serdar Berdimuhamedow azerbaýjanly kärdeşi Ylham Alyýewiň iki ýurduň arasyndaky köptaraplaýyn hyzmatdaşlygy pugtalandyrmakdaky şahsy goşandyny belläp geçdi. Bu barada türkmen döwletiniň baştutanynyň Azerbaýjanyň Prezidentine doglan güni mynasybetli ugradan gutlagynda aýdylýar.
"Türkmenistan bilen Azerbaýjan Respublikasynyň arasyndaky netijeli hyzmatdaşlygyň geljekde-de halklarymyzyň bähbidi üçin iň gowy dostluk we hoşniýetli goňşuçylyk däplerinde üstünlikli ösjekdigine ynanýaryn", - diýlip, Azerbaýjanyň Prezidentiniň internet saýtynda çap edilen habarda aýdylýar. Onda Ylham Alyýewiň ýolbaşçylygynda "Azerbaýjan Respublikasynyň depginli ösüş ýolundan ynamly ýöräp, jemgyýetiň durmuşynyň ähli ugurlarynda ajaýyp üstünlikleri gazanyp, dünýädäki abraýyny yzygiderli berkidýändigi" bellenilýär.
“Awaza” Milli syýahatçylyk zolagynda geçirilen Türkmenistan-Azerbaýjan-Türkiýe döwlet baştutanlarynyň ilkinji üçtaraplaýyn sammitiniň çäginde Siziň bilen bolan duşuşygymyzy ýakymly täsirler bilen ýatlaýaryn, onuň dowamynda taraplaryň ikitaraplaýyn we köptaraplaýyn görnüşde ýurtlarymyzyň arasyndaky hyzmatdaşlygyň yzygiderli giňelmegine we pugtalandyrylmagyna ygrarlydygy ýene bir ýola tassyklandy" – diýlip, gutlag hatynda aýdylýar.
Serdar Berdimuhamedow Alyýewe berk jan-saglyk, bagt, maşgala abadançylygyny we üstünlik arzuw etdi.
24-nji dekabrda Azerbaýjanyň Prezidenti Ylham Alyýew 61 ýaşady.
ORIENT news
