Horwatiýa – Futbol planetasynyň üçünji topary!
Şenbe güni Kataryň paýtagty - Dohada "Halifa International" stadionynda dünýä çempionatynyň üçünji ýeri ugrundaky oýun geçirildi. Bürünç medal ugrunda tejribeli horwatlar we heniz hemmeler üçin häbelli bolan topar - Marokkonyň ýygyndysy tutluşdylar.
Duşuşyk adatdan daşary waka bolmazdan tamamlandy - marokkolylar 2:1 hasap bilen utulyp, eşikleri "şaşka" şekilleri bilen bezelen futbol toparyny öňe geçirdiler.
Zlatko Daliçiň ýetişdiren türgenleri yzly-yzyna ikinji dünýä çempionatyndan baýrak bilen ýurduna dolanýarlar – mundan ozalky dünýä çempionatynda (Russiýa-2018) horwatlar kümüş medal gazandylar.
Iki toparyň hem eýýäm toparlaýyn tapgyrda duşuşandygyny bellemelidiris. Şonda oýun golsuz deňme-deň hasap bilen tamamlandy.
Üçünji ýer ugrundaky oýnuň ýedinji minuty Marokkonyň ýygyndysa üçin aýgytly boldy. Horwatlaryň merkezi goragçysy Gwardiol jerime urgusy oýnalanda, kellesi bilen urup, kombinasiýany üstünlikli tamamlady.
Çempiyonatyň tutuş dowamynda derwezelerine az sanly pökgi geçirden marokkolylar şeýle çalt fiaskodan “kine etdiler” we, özlerine uzak garaşdyrman, iki minut soňra diýen ýaly hasaby deňlediler – jerime urgudan soň, Dari kellesi bilen uurup, pökgini tora saldy.
Emma 42-nji minutda horwatlaryň ýarymgoragçysy Orşiç göni urgy bilen takyk urup, Marokkanyň derwezeçisine puryja bermedi.
Özara hüjümlere we derwezäni bir tarapdan bolşy ýaly, beýleki tarapdan hem almak mümkinçilikleriň bolandygyna garamazdan, ikinji ýarymda hasap üýtgemedi – 2:1.
Şeýlelikde, Horwatiýanyň ýygyndy topary Katarda geçirilen dünýä çempionatynda baýrak alanlaryň ilkinjisi boldy.
Şeýle-de bolsa, "Geljek 4 ýylda futbol boýunça dünýäde ilkinji bolmak haýsy toparyň paýyna düşer?" diýen esasy soraga jogap heniz ýok.
Finalçylar – Fransiýanyň we Argentinanyň milli ýygyndy toparlarynyň arasyndaky oýun 18-nji dekabrda ýekşenbe güni Lusail Ikonik stadionynda geçiriler.
Häzir kim Dohada bolsa - duşuşyga hoş geldiňiz, kim başga ülkelerde bolsa – hemmämiz telewizorlarymyzyň başyna üýşeliň!
Artur PETROSÝANS
