Türkmen türgenleri Halkara taýboks ýaryşynda ýeňiji boldular
Türkiýäniň Antalýa şäherinde geçirilen halkara ýaryşynda Türkmenistanyň taý boks ussatlary bäş sany baýrakly orunlara mynasyp boldular. Baýraklaryň arasynda – bir altyn, üç kümüş we bir bürünç medaly bar. Bu barada TDH agentligi habar berýär.
86 kilograma çenli agram derejesinde bäsleşen Aşgabat şäheriniň 2-nji sport mekdebiniň bedenterbiýe we sport bölüminiň taýboks boýunça tälimçisi Mustapa Saparmyradow türkmen toparynyň hazynasyna altyn medalyny getirdi.
Kümüş medallara - Türkmen döwlet bedenterbiýe we sport institutynyň talyplary Bäşim Bäşimow (60 kg çenli), Muhammet Jumamyradow (81 kilograma çenli) we Döwletmyrat Güýjow (91 kg-dan gowrak) mynasyp boldular.
«Bürünç» medala 90 kg çenli agram derejesinde - paýtagtyň 4-nji sport mekdebiniň bedenterbiýe we sport bölüminiň kikboks boýunça tälimçisi Muhammetberdi Röwşenow mynasyp boldy.
Bu ýaryşa dünýäniň 32 döwletinden 756 sany türgen, şol sanda Türkmenistandan 9 türgen gatnaşdy.
ORIENT news
Surat: ria.ru
