CAREC ýurtlarynyň ministrleri pandemiýadan soňky döwürdäki ýaşyl dikeldiş boýunça başlangyçlary makulladylar
Merkezi we Günbatar Aziýa ýurtlary sebitiň COVID-19 pandemiýasyndan soň gaýtadan dikeldilmegini çaltlaşdyrmak, azyk howpsuzlygyny ýokarlandyrmak we ekologiýa taýdan arassa energiýany ösdürmegi üpjün etmek boýunça üç sany serhetara hyzmatdaşlyk ugrundaky başlangyçlaryny tassykladylar.
Bu barada ýurdumyzyň maliýe we ykdysadyýet ministri Muhammetgeldi Serdarowyň ýolbaşçylygyndaky Türkmenistanyň wekiliýetiniň onlaýn görnüşde gatnaşmagynda geçirilen 21-nji CAREC ministrler maslahatynda mälim edildi.
Maslahatyň barşynda Türkmenistanyň, Azerbaýjanyň, Hytaý Halk Respublikasynyň, Gruziýanyň, Gazagystanyň, Gyrgyzystanyň, Mongoliýanyň, Pakistanyň, Täjigistanyň we Özbegistanyň ministrleri aşakdaky başlangyçlary makulladylar:
- pandemiýadan soňky döwürde ekologiýany, durnukly ösüşi öz içine alýan gaýtadan dikeldiş çarçuwaly maksatnama,
- oba hojalygyny ösdürmek we azyk howpsuzlygy üpjün etmek pudagynda hyzmatdaşlygyň çarçuwaly maksatnama,
- CAREC Ýaşyl energiýa bileleşigi hakynda şertnama.
Bu başlangyçlaryň çäklerinde CAREC ýurtlary COVID-19-yň täsirini ýeňip geçmek, azyk önümleriniň halkara söwdasyny ýola goýmak we sebitde gaýtadan dikeldilýän energiýany we energiýa netijeliligi üçin tehnologiýalary maliýeleşdirmek boýunça dürli ugurlarda has ýakyndan bilelikde hyzmatdaşlyk etmäge çalyşarlar.
CAREC maksatnamasy durnukly ösüşi üpjün etmek üçin bilelikde işleýän ýurtlaryň hyzmatdaşlyk bileleşigi bolup, ykdysady ösüşi çaltlaşdyrmagy we sebitdäki garyplygy azaltmagy maksat edinýär.
ORIENT news
Surat Türkmenistanyň maliýe we ykdysadyýet ministrligi tarapyndan berildi
