Noýabr aýynyň ahyrynda geljek ýyly “Dialog – parahatçylygyň kepili” diýip yglan etmek barada Kararnamanyň kabul edilmegine garaşylýar
– BMG-nyň Baş Assambleýasy tarapyndan Türkmenistanyň başlangyjy esasynda 2023-nji ýyly halkara derejede “Dialog – parahatçylygyň kepili” diýip yglan etmek barada Kararnamanyň noýabr aýynyň ahyrynda kabul edilmegine garaşylýar – diýip, Daşary işler ministriniň orunbasary Wepa Hajyýew penşenbe güni Samarkantda geçirilen Merkezi Aziýa we Ýewropa Bileleşiginiň döwletleriniň daşary işler ministrleriniň 18-nji duşuşygynda aýtdy.
– Şeýle hem, türkmen wekiliýetiniň ýolbaşçysy Merkezi Aziýadan we Ýewropa Bileleşiginden öz kärdeşlerini dekabr aýynyň ikinji ongünlüginde geçiriljek Aşgabat halkara hepdeligine we “Dialog – parahatçylygyň kepili” atly maslahata gatnaşmaga çagyrdy – diýlip, Türkmenistanyň Daşary işler ministrliginiň internet saýtynda habar berilýär.
Wepa Hajyýew öz çykyşynda häzirki duşuşygyň ilkinji “Ýewropa Bileleşigi-Merkezi Aziýa” sammitinden birnäçe hepde soň geçirilýändigini we ýokary derejedäki duşuşyklaryň netijesinde kabul edilen bilelikdäki çözgütleriň köptaraplaýyn hyzmatdaşlygyň giň gerimi boýunça geljekki çekişmeleriniň başlangyç nokady bolmalydygyny aýtdy.
Ýewropa Bileleşigi-Merkezi Aziýa formatyndaky indiki ministrler ýygnagy 2023-nji ýylda Brýusselde geçiriler.
ORIENT news
