Samarkantda Türki döwletleriň guramasyna girýän ýurtlaryň daşary işler ministrleriniň geňeşiniň DIMG-niň mejlisi geçirildi
Samarkantda Türki döwletleriň guramasynyň (TDG) sammitiniň öňüsyrasynda TDG-ä girýän ýurtlaryň daşary işler ministrleriniň geňeşiniň mejlisi geçirildi.
Çärä Özbegistanyň, Gazagystanyň, Gyrgyzystanyň, Türkiýäniň, Wengriýanyň daşary syýasat edaralarynyň ýolbaşçylary hem-de Azerbaýjanyň we Türkmenistanyň daşary işler ministrleriniň orunbasarlary, şeýle hem TDG-niň baş sekretary we degişli guramalaryň – TÜRKSOÝ-yň, TürkPA-nyň, Halkara türki akademiýasynyň, Halkara türki medeniýeti we mirasy gaznasynyň ýolbaşçylary gatnaşdylar.
Türkmen wekiliýetiniň ýolbaşçysy, daşary işler ministriniň orunbasary Berdinyýaz Mätiýew çykyşynda TDG-niň çäklerindäki söwda-ykdysady gatnaşyklara ünsi çekip, ýangyç-energetika, ulag-kommunikasiýa toplumlarynda we senagat pudagynda türki ýurtlaryň arasynda ikitaraplaýyn hem-de köptaraplaýyn hyzmatdaşlygy ösdürmek üçin mümkinçilikleriň bardygyny nygtady diýip, türkmen daşary syýasat edarasynyň metbugat gullugy habar berýär.
Duşuşyga gatnaşyjylar sebit we halkara gün tertibiniň hem-de Guramanyň çäklerinde özara hereketleriň möhüm meseleleri boýunça pikir alyşdylar, şeýle hem anna güni, 11-nji noýabrda Samarkantda geçiriljek Türki döwletleriň guramasynyň sammitiniň dowamynda gol çekmäge çykaryljak resminamalaryň taslamalaryna garadylar.
Liderleriň boljak duşuşygy türki ýurtlaryň arasynda anyk hyzmatdaşlygyň täze gözýetimlerini we mümkinçiliklerini açmaga gönükdirilendir. “Türki dünýäsiniň garaýşy 2040” konsepsiýasyny durmuşa geçirmegiň çäklerinde 2022-2026-njy ýyllar üçin TDG-niň Strategiýasynyň kabul edilmegi bu çäräniň ähmiýetli wakasy bolar.
ORIENT news
