Türkmen hünärmenleri ÝHHG-nyň ýolagçylar barada maglumatlary alyşmak boýunça okuw sapagyna gatnaşdylar
Türkmenistanyň Döwlet migrasiýa gullugynyň wekilleri Ýewropada Howpsuzlyk we hyzmatdaşlyk guramasynyň halkara uçuşlarynyň ýolagçylary barada ilkinji maglumatlary alyşmak boýunça okuw sapagyna gatnaşdylar.
Awstriýa Respublikasynyň Wena şäherinde 1-nji noýabrdan 4-nji noýabry aralygynda iş maslahatlary we okuw sapaklary geçirildi. Bu barada Türkmenistanyň Döwlet migrasiýa gullugynyň resmi web saýtynda habar berilýär.
Çäreleriň barşynda kabul edýän ýurtlaryň arasynda raýatlar barada deslapky maglumatlary alyşmagyň we şübheli adamlaryň hereketine gözegçilik etmegiň usullary bilen baglanyşykly meseleler ara alnyp maslahatlaşyldy. Bu ugurdaky halkara hünärmenler maglumatlary toplamak, derňemek we mundan beýläk hem dowam etdirmek boýunça tejribe alyşdylar.
Okuw sapagyna gatnaşyjylar halkara guramalary bilen hyzmatdaşlygy giňeltmekde we tejribe alyşmakda şeýle duşuşyklary yzygiderli geçirmegiň möhümdigini bellediler.
ORIENT news
Surat: m.gordonua.com
