Wladimir Putin: "Siz ikitaraplaýyn döwletara gatnaşyklaryň ösmegine uly goşant goşduňyz"
– Wladimir Putin Gurbanguly Berdimuhamedowa Russiýanyň “Watan öňündäki hyzmatlary üçin” ordeniniň IV derejesini gowşurdy. Baýrak gowşurylyş dabarasy penşenbe güni Kremlde Russiýanyň Prezidentiniň Türkmenistanyň Milli Geňeşiniň Halk Maslahatynyň Başlygy bilen bolan duşuşygynda bolup geçdi – diýip, kremlin.ru habar berýär.
Baýragy gowşurmak bilen, Putin: “Siz ikitaraplaýyn döwletara gatnaşyklarymyzyň ösmegine uly goşant goşduňyz. Bu ynsanperwer we ykdysady ugurlardaky işleriň ählisine degişlidir. Siziň hut özüňiziň gatnaşmagyňyzda Russiýa bilen Türkmenistanyň arasyndaky gatnaşyklar strategiki hyzmatdaşlygyň örän ýokary derejesine ýetdi. Bu sepgitleriň hemmesini göz öňünde tutup, Sizi Russiýanyň döwlet baýragy – “Watan öňündäki hyzmatlary üçin” ordeniniň IV derejesi bilen sylaglamak kararyna geldik. Bu ýokary baýrak Siziň döwletara gatnaşyklaryň ösmegine goşan goşandyňyza doly laýyk gelýär" – diýip aytdy.
Gurbanguly Berdimuhamedow hem öz gezeginde Türkmenistanyň we Russiýa Federasiýasynyň "wagt we durmuş arkaly" ýurtlaryň arasyndaky strategiki hyzmatdaşlygy subut edendigini, bu gatnaşyklaryň ýylsaýyn güýçlenýändigini we giňelýändigini aýtdy.
“Men adamyň durmuşynda beýle möhüm we taryhy günler juda seýrek bolýar diýip hasaplaýaryn – men Russiýa Federasiýasynyň ýokary döwlet baýragyna mynasyp boldum, bu bolsa Türkmenistan we Russiýanyň halklarynyň, hakykatdanam, hoşniýetli goňşuçylyk we hyzmatdaşlyk gatnaşyklaryny saklaýandygyny ýene bir gezek subut edýär. Bu gatnaşyklara Siziň we meniň hem taryhy goşant goşandygymyz begendirýär" – diýip, Berdimuhamedow aytdy.
“Watan öňündäki hyzmatlary üçin” ordeni Russiýada apostol Andreý Perwozwanyý ordeninden soň ikinji orunda durýan döwlet baýragydyr.
ORIENT news
