Halk Maslahatynyň başlygynyň Günorta Koreýa sapary meýilleşdirilýär
Ýakyn wagtda Halk Maslahatynyň – türkmen parlamentiniň ýokary palatasynyň başlygy Gurbanguly Berdimuhamedowyň Koreýa Respublikasyna sapary meýilleşdirilýär. Bu barada “Merkezi Aziýa–Günorta Koreýa” hyzmatdaşlyk forumyna gatnaşyjy ýurtlaryň daşary syýasat edaralarynyň ýolbaşçylarynyň Seulda duşenbe güni günüň ikinji ýarymynda premýer-ministr Han Doksu bilen geçirilen duşuşygy barada türkmen MID-niň beren habarynda aýdylýar.
Duşuşygyň dowamynda Türkmenistanyň daşary işler ministri Raşid Meredow Koreýanyň premýer-ministri Han Doksu bilen söwda-ykdysady we maýa goýum ulgamlarynda Türkmenistan bilen Koreýa Respublikasynyň arasyndaky gatnaşyklary ösdürmegiň geljegini ara alyp maslahatlaşdy.
Şeýle hem taraplar Aşgabatda hem-de ýurduň beýleki sebitlerinde patyşa Sejongyň Institutynyň Gaznasynyň medeni-bilim we diller boýunça taslamalaryny giňeltmegiň mümkinçiligine garadylar.
Türkmen tarapynyň häzirki zaman maglumat-aragatnaşyk tehnologiýalaryny ulanmak arkaly bilim ugry boýunça hyzmatdaşlygy dowam etmäge gyzyklanmasy beýan edildi.
Premýer-ministr energetika we senagat taslamalarynyň durmuşa geçirilmeginde koreý kompaniýalarynyň mümkinçiliklerine türkmen tarapynyň ünsüni çekdi. Öz nobatynda, Meredow ýurdunyň nebiti gaýtadan işlemek, energetika, himiýa, älem we ulag ýaly ulgamlarda Koreýa bilen hyzmatdaşlyk etmäge gyzyklanma bildirýändigini tassyklady diýlip, koreý premýeriniň edarasynyň metbugat habarynda bellenilýär.
ORIENT news
