Hytaýyň Kommunistik partiýasynyň XX gurultaýynda ýurduň ösüşiniň geljekdäki ugry kesgitlenýär
Pekinde Hytaýyň Kommunistik partiýasynyň (HKP) XX gurultaýy açyldy, onda ýurduň geljekdäki ösüş ugry kesgitlener we ýokary partiýa ýolbaşçylary saýlanar – diýip, Chinadaily hbar berýär.
Hytaýyň dürli künjeklerinden 2296 wekiliň gatnaşýan gurultaýy 22-nji oktýabra çenli dowam eder. Bu çärede HKP-nyň Merkezi komitetiniň 19-njy çagyrylyşynyň hasabatyna, partiýanyň düzgünnamasyna girizilen üýtgetmelere serediler we 20-nji çagyrylyşyň Merkezi komiteti we Düzgün-nyzam gözegçiligi boýunça merkezi komissiýasy saýlanar.
HKP-nyň Merkezi komiteti HKP-nyň Bütinhytaý gurultaýlarynyň arasyndaky aralyklarda partiýanyň iň ýokary dolandyryş organydyr. Merkezi komitetiň Syýasy býurosy kararlary kabul etmek we syýasy çäreler görmek üçin bäş ýyllyk möhletiniň dowamynda birnäçe plenar mejlisleri çagyrýar.
HKP-nyň Bütinhytaý gurultaýy Hytaýyň dolandyryjy partiýasynyň iň ýokary organydyr. Ol Merkezi komitet tarapyndan bäş ýylda bir gezek çagyrylýar.
HKP-nyň Merkezi komitetiniň plenumy ýa-da plenar mejlisi Merkezi komitetiň Syýasy býurosy tarapyndan ýylda azyndan bir gezek we bäş ýyllyk iş möhletinde ýediden köp bolmadyk gezek çagyrylýar.
HKP-nyň Bütinhytaý gurultaýyna 2000 töweregi delegat (wekil) gatnaşýar. Olar täze Merkezi komiteti saýlaýarlar we partiýanyň içindäki möhüm meseleleri ara alyp maslahatlaşýarlar. Merkezi komitetiň plenar mejlisine ýüzlerçe partiýanyň doly agzalary we dalaşgär agzalary gatnaşýarlar.
Düzgün bolşy ýaly, ilkinji plenar mejlisde Syýasy býurony we onuň hemişelik komitetini, şeýle hem HKP-nyň Merkezi komitetiniň baş sekretaryny saýlaýarlar.
ORIENT news
Surat: chinadaily.com.cn
