Amerikan kompaniýalarynyň baştutanlary Türkmenistana işewürlik saparyny amala aşyrarlar
ABŞ-nyň kompaniýalarynyň ýolbaşçylary şu ýylyň ahyryna çenli söwda we maýa goýum ulgamynda hyzmatdaşlygyň meslelerini ara alyp maslahatlaşmak üçin Türkmenistana sapar bilen gelmegi meýilleşdirýärler. Bu barada Trend neşirine «Türkmenistan–ABŞ» Işewürler geňeşiniň ýerine ýetiriji direktory Erik Stýuart gürrüň berdi.
«COVID-19 pandemiýasy zerarly dünýä ýüzünde saparlara çäklendirmeleriň ýüze çykmagy ABŞ bilen Türkmenistanyň arasyndaky işewürlik hyzmatdaşlygy haýallady. Ýöne indi, pandemiýa, göräýmäge, çynlakaý mesele hökmünde aradan aýrylandan soň, şu ýylyň dowamynda ABŞ-nyň kompaniýalarynyň ýolbaşçylary işewürlik saparyny amala aşyrmagy meýilleşdirýärler» - diýip, geňeşiň baştutany aýtdy.
Şeýle hem Erik Stýuart geljek boljak sapar ABŞ-nyň energetika, senagat, oba hojalyk, maliýe we syýahatçylyk kompaniýalarynda uly gyzyklanma döredýär - diýip, belledi.
«Bu ABŞ bilen Türkmenistanyň arasyndaky gatnaşyklary berkitmek we çuňlaşdyrmak üçin örän gowy mümkinçilik bolar. Biz gatnaşyklary ozalkysy ýaly saklamagy we işewürlik mümkinçilikleri ulanmagy dowam etdirmek isleýäris» – diýip, Stýuart sözüni jemledi.
ORIENT news
Surat: pikabu.ru
