Türkmenistanyň we Özbegistanyň Prezidentleri Aşgabatda «Taşkent» seýilgähini açdylar
Türkmenistanyň Prezidenti Serdar Berdimuhamedow we Özbegistanyň döwlet baştutany Şawkat Mirziýoýew Aşgabatdaky «Taşkent» seýilbagynyň açylyş dabarasyna gatnaşdylar. Bu barada TDH habar berýär.
Mäkäm türkmen-özbek dostlugynyň nyşanyna öwrülen seýilgähiň dizaýnynda milli özbek binagärligi we bezegi düzüm bölekleri ulanyldy.
Seýilgähiň çäginde maşgala bolup dynç almak üçin hem amatly şertler döredilipdir – dürli reňkler bilen bezelen attraksionlar we oýun meýdançalary çagalaryň göwnünden turjakdygy şübhesizdir, ulular bolsa «Daşkent» kafesinde, çaýhanada, restoranda we açyk asmanyň astynda geçiriljek konsertler üçin amfiteatrda oňaýly dynç alyp bilerler.
Daşkende bolan ýa-da Özbegistanyň paýtagty bilen fotosuratlarda görenler täze seýilgähiň gurluş dizaýnynda şäheriň nyşanyny açyp görkezýän özboluşly elementleri tapar.
Mysal üçin, seýilgähdäki mozaika bilen bezelen suw çüwdüriminde ýer şaryny we asmana sary ýokary göterilýän leglekleri şekillendirýän heýkeltaraşlyk kompozisiýasy Daşkentiň baş meýdançasyndaky arkanyň üstündäki bilen birmeňzeşdir. Daşkent gözel künjegini bezäp duran telewizion diňiň kiçi nusgasyny hem aňsatlyk bilen tanap bolýar, ol Özbegistanyň paýtagtynyň esasy gelim-gidimli ýerleriniň biridir.
Ozal 2018-nji ýylyň aprelinde Özbegistanyň paýtagtynda Aşgabat seýilgähi açylypdy, bu goňşy ýurtlaryň arasyndaky dostlugyň aýdyň nyşanyna öwrülen seýilgäh birnäçe ýyl bäri Daşkentiň ýerli ýaşaýjylarynyň we onuň myhmanlarynyň arasynda uly meşhurlyk gazandy.
ORIENT news
Surat: tdh.gov.tm
