Owganystanda TOPH gaz geçirijisiniň ugry boýunça welosiped ýörişi geçirilýär
“TOPH – parahatçylygyň nyşany” – atly şygar bilen şu günler Türkmenistan-Owganystan-Päkistan-Hindistan gaz geçirijisiniň owgan böleginiň ugry boýunça welosiped ýörişi geçirilýär. Bu barada ORIENT-e Türkmenistanyň diplomatik edarasynda habar berildi.
Owganystanyň Hyrat welaýatynyň Welosport federasiýasynyň başlygynyň orunbasary Abdul Hadi Naseriň ýolbaşçylygyndaky dokuz tigirçi 9-njy oktýabrda Turgundi şäherinden ýörişe başladylar. Olaryň ugry Hyrat, Farah, Nimroz, Helmand we Kandahar welaýatlaryndan geçýär. “Dawandar” topary 16 günüň içinde tutuş menzili geçmegi we ýurduň günortasynda ýerleşen Spin-Boldak sebitindäki owgan-pakistan serhedine ýetmegi göz öňünde tutýär.
Türkmenistanyň Hyratdaky Baş konsullygy Abdul Hadi Naseriň bu başlangyjyny goldady we TOPH gaz geçirijisiniň owgan halky üçin durmuş-ykdysady ähmiýetine jemgyýetçiligiň ünsüni çekýän sport çäresiniň geçirilmegini makullady.
“Dawandaryň” lideri bilen söhbetdeşlikde Owganystandaky welosiped hereketini işjeňleşdirmek we TOPH taslamasyny öňe sürmäge ýardam bermek üçin geljekde-de şuňa meňzeş çäreleri geçirmek kararyna gelindi.
Tigirçi aktiwistleriň topary Hyrata gaýdyp gelenden soň, Türkmenistanyň Baş konsullygynyň wekilleriniň gatnaşmagynda olary garşy almak we toparyň agzalaryna sowgat gowşurmak dabarasyny guramak meýilleşdirilýär.
TOPH welosiped ýörişi barada owgan KHBS-nde giňişleýin habar berildi we taslamanyň iş ýüzünde durmuşa geçirilmegi baradaky çagyryşa ýerli jemgyýetleriň oňyn seslenmesine eýe boldy.
ORIENT news
