Türkmenistanyň wekiliýeti Duşenbe şäherinde terrorçylyga garşy göreşmek çäreleriniň ara alnyp maslahatlaşylmagyna gatnaşýar
Daşary işler ministriniň orunbasary Wepa Hajyýewiň ýolbaşçylygyndaky Türkmenistanyň wekiliýeti Duşenbe şäherinde “Terrorçylyga garşy göreşmek we terrorçylaryň hereketleriniň öňüni almak üçin serhetleriň howpsuzlygy hem-de serhet gözegçiligi ulgamynda halkara we sebit hyzmatdaşlygy” atly ýokary derejeli maslahata gatnaşdy.
Maslahatyň açylyş dabarasynda oňa gatnaşyjylary Täjigistanyň Prezidenti Emomali Rahmon, BMG-niň Baş sekretary Antoniu Guterriş, BMG-niň Baş sekretarynyň orunbasary we Terrorçylyga garşy göreşmek müdiriýetiniň başlygy Wladimir Woronkow, şeýle hem Merkezi Aziýa döwletleriniň beýleki ýokary wezipeli ýolbaşçylary, beýleki sebitlerden hem-de halkara guramalardan hyzmatdaşlar mübäreklediler.
Wepa Hajyýew forumda çykyş edip, terrorçylyga garşy göreşmek, bu babatda hereket etmegiň utgaşdyrylmagyny gowulandyrmak we hemişe maglumatlary alyşmak meselelerinde köptaraplaýyn gatnaşyk etmäge toplumlaýyn çemeleşmegiň zerurdygyny nygtady diýlip, Türkmenistanyň DIM-niň saýtynda habar berilýär.
Türkmen diplomaty şu ýylyň mart aýynda Terrorçylyga garşy hereket etmek boýunça rejelenen görnüşde bileleikdäki meýilnamanyň kabul edilmeginiň wajypdygyny, bu resminamanyň Terrorçylyga garşy ählumumy strategiýany durmuşa geçirmäge uly goşant bolup, bu barada 2011-nji ýylyň 30-njy noýabryndaky Aşgabat jarnamasynda ilkinji gezek beýan edilendigini belledi.
Terrorçylyk howpuna garşy göreşmäge gönükdirilen ählumumy tagallalaryň jemlenilmegi BMG-niň, hususan-da, onuň Terrorçylyga garşy göreşmek müdiriýetiniň utgaşdyryjy häsiýetli orun eýelemeginde amala aşyrylmalydyr. Şunuň bilen baglylykda, BMG-niň Merkezi Aziýada terrorçylyga garşy göreşmek müdiriýetiniň hemişelik hereket edýän maksatnamalaýyn edarasyny döretmegiň öz wagtydygy, munuň bolsa sebitiň ýurtlaryna tehniki taýdan kömek bermegiň netijeliligini artdyrmaga mümkinçilik berjekdigi nygtaldy.
Şeýle hem maglumat tehnologiýalarynda we kibergiňişlikde taraplaryň bilelikdäki tagallalaryny has-da işjeňleşdirmek, taslama mümkinçiligini ulanmak arkaly hereket edýän gepleşikler, maslahatlaşma meýdançalaryny pugtalandyrmak boýunça teklip öňe sürüldi.
ORIENT news
