OGT-2022: Geljegiň durnukly energiýa ulgamyna tarap – Aşgabat forumynyň mowzuklary
Pesuglerodly ösüşe geçiş şertlerinde geljegiň durnukly energiýa ulgamyny döretmek dünýä bazaryna gatnaşýanlaryň ählisiniň – döwlet, işewürler we akademiki toparlaryň hyzmatdaşlygyny we bilelikdäki hereketini talap edýär. "Türkmenistanyň nebiti we gazy - 2022" XXVII Halkara forumy energiýa çeşmelerini gözlemek, öndürmek, daşamak we gaýtadan işlemek pudagynda ylmy we tehniki bilimleri, netijeli usullary we tejribeleri mundan beýläk-de ösdürmek üçin gurnaldy.
Bu çäre indiki hepde – 26-28-nji oktýabr aralygynda "Türkmengaz" we "Türkmennebit" Döwlet konsernleriniň, Türkmenistanyň Söwda-senagat edarasynyň we "Türkmengeologiýa" Döwlet korporasiýasynyň howandarlygynda geçiriler. Gaffney Cline iňlis kompaniýasynyň goldamagynda "Türkmen Forum" HJ öňdebaryjy pudagyň çäresini guramakda hyzmatdaş bolup çykyş edýär.
"Türkmenistanyň nebiti we gazy – 2022" maslahatynyň we sergisiniň maksady halkara gepleşikleri berkitmek, global energiýa ulgamynyň soňky tendensiýalaryny seljermek we mümkinçiliklerini öwrenmek arkaly Türkmenistanyň nebit-gaz pudagyna göni daşary ýurt maýa goýumlaryny çekmekden ybarat.
Bu ýyl TNG-2022 Aşgabatda delegatlary ýygnaýar, muňa seretmezden, forum şol bir wagtda onlaýn ýagdaýda geçiriler. Sergi nebitgaz kompaniýalarynyň gazananlary we geljegi uly taslamalary bilen tanyşdyrar, maslahatda bolsa hökümet wekilleri, döwlet edaralarynyň ýolbaşçylary, pudak ýolbaşçylary we bilermenler derwaýys meseleler babatda pikir alyşmaga, bilimleri, tejribesi we innowasiýalary bilen paýlaşmaga, şeýle-de täze pikirlerini teklip etmäge, tehnologik we telekeçilik işjeňliginde mundan beýläkki gözlegleri höweslendirmäge mümkinçilik alarlar.
Maslahat "Energetika ulgamynyň geljegi: täze kynçylyklar we mümkinçilikler" atly umumy mejlis bilen açylar. Birinji günüň mejlislerinde garaljak esasy meseleleriň arasynda “Hazar deňziniň kenarynda we gury ýerde Türkmenistanyň energiýa pudagyna maýa goýum mümkinçilikleri, täze gazhimiýa taslamalary” diýen tema aýratyn orun tutýar.
Täze döwrüň energiýa taslamalaryny ösdürmek, gaýtadan dikeldilýän energiýa önümçiligine we wodorod tehnologiýalaryna geçmek – aýratyn ünse eýe boljak mowzuklaryň biri bolar. Bu ýerde Günbatar Türkmenistanda gurulmagy meýilleşdirilýän kuwwatlygy 10 MWt bolan ýel-gün gibrid elektrik stansiýasy we beýleki iri maýa goýum taslamalary görkeziler. Delegatlar arassa energiýany ösdürmekde we Türkmenistanyň gaýtadan dikeldilýän energiýa çeşmeleri babatdaky strategiýasynda halkara maliýe guramalarynyň ornuny ara alyp maslahatlaşarlar.
Maslahatyň ikinji güni, 27-nji oktýabr, “Uglewodorod ýataklaryny özleşdirmegiň ekologik taraplary” atly bölümçesiniň çäginde uglewodorodyň önümçilik-ýerleme yzygiderliginiň elementlerinde metanyň zyňyndylary baradaky maglumatlar we hasabatlara, zyňyndylaryň möçberini ölçemekde innowasiýalara, şeýle-de hasabatlara bolan talapnamalara garalar, sebäbi dünýä gaz pudagy parnik gazlarynyň zyňyndylaryny azaltmagyň üstünde işleýär.
Maslahata gatnaşyjylar önümçiligi paýlaşmak barada şertnama boýunça Türkmenistanda işleýän halkara nebitgaz kompaniýalarynyň mysalynda derwaýys meseleleri seljererler. Mundan başga-da, kompaniýalar metanyň we kömürturşy gazynyň zyňyndylaryny azaltmak, ýerasty gaz saklaýyş tehnologiýasy we CO2-ni ýerasty howdana ýerlemek we ş.m. ylmyň iň soňky gazananlary we hereket meýilnamasy bilen tanyşdyrarlar.
Maslahatyň üçünji güni, 28-nji oktýabr, innowasiýa tehnologiýalaryna we nebit-gaz ylymlarynda, ýöriteleşdirilen bilimde nou-hau bagyşlanar. Bu sessiýanyň çäginde ýangyç we energiýa toplumy üçin ýokary hünärli işgärleri taýýarlamak ugrundaky esasy meseleler we üstünlikler, şol sanda ylmy potensialy ösdürmek, ylmy-gözleg işleriniň orny baradaky mowzuklar hödürlener.
Bular TNG-2022-niň uglerod bazarlary, ýangyjyň ekologik taýdan arassa görnüşleri we girdeji gazanmak, zyňyndylary azaltmak üçin zerur bolan tehnologiýalar boýunça hödürleýän esasy ugurlarydyr. Mundan başga-da, forum platformasy sergä gatnaşyjylara, kompaniýalaryň ýolbaşçylaryna, alymlara, işläp düzüjilere we maýadarlara Türkmenistanyň nebit-gaz pudagynyň ýolbaşçy düzümi bilen ýüzbe-ýüz we onlaýn görnüşde duşuşmaga mümkinçilik berýär.
TNG-2022 – bu hereket edýän hyzmatdaşlygy berkitmek we täze işewürlik mümkinçiliklerini döretmek, energiýa we tebigy gaz pudagynda maliýeleşdirmekden we ylymdan başlap, önümçilige we sarp edişe çenli, aragatnaşyk ulgamyny giňeltmek üçin ajaýyp platformadyr.
ORIENT news
