Türkmen-gazak gepleşikleri bilelikdäki resminamalaryň 14-üsine gol çekilmegi bilen tamamlandy
Astanada Gazagystanyň we Türkmenistanyň resmi wekiliýetleriniň agzalarynyň gatnaşmagynda iki ýurduň liderleriniň arasyndaky gepleşikler tamamlandy. Taraplar ikitaraplaýyn gün tertibinde derwaýys meseleleriň birnäçesini jikme-jik ara alyp maslahatlaşdylar we mundan beýläkki hyzmatdaşlygyň esasy ugurlaryny kesgitlediler.
Gepleşikleriň netijesi boýunça Kasym-Jomart Tokaýew we Serdar Berdimuhamedow Bilelikdäki beýannama kabul etdiler.
Şeýle hem, resminamalar bukjasyna gol çekildi. Olaryň sanawy Akorda saýtynda doly berlendir.
Hususan-da, 2022-2024-nji ýyllar üçin ikitaraplaýyn hyzmatdaşlyk boýunça toplumlaýyn maksatnama kabul edildi, şeýle-de pudaklaýyn derejede maliýe syýasaty, himiýa senagaty, syýahatçylyk, ulag-üstaşyr özara hyzmatdaşlygy, älem giňişligini öwrenmek we ulanmak, ösümlikleriň karantini ýaly ugurlarda hyzmatdaşlyk we düşünişmek barada memorandumlar kabul edildi.
Gazagystan Pespublikasynyň Daşary işler ministrliginiň ýanyndaky Daşary syýasaty öwreniş instituty bilen Türkmenistanyň Daşary işler ministrliginiň HGI-nyň strategik gözleg merkeziniň arasynda; Gazagystan Respublikasynyň Daşarysöwda palatasy bilen Türkmenistanyň Söwda-senagat palatasynyň arasynda; Gazagystan Respublikasynyň "Atameken" Milli telekeçiler palatasy bilen Türkmenistanyň Senagatçylar we telekeçiler Birleşmesiniň arasynda özara düşünişmek hakynda memoranduma gol çekildi.
Iki ýurduň Içeri işler ministrlikleri jenaýatçylyga garşy göreşmek maksady barada memorandum kabul etdiler we Abylaý han adyndaky Gazagystanyň Halkara gatnaşyklar we dünýä dilleri uniwersiteti Döwletmämmet Azady ad. Türkmen milli dünýä dilleri instituty bilen hyzmatdaşlyk şertnamasyna gol çekdi. Jemi bilelikdäki resminamalaryň 14-üsine gol çekildi.
ORIENT news
Foto: akorda.kz
