China Daily: Hytaýyň täze garaýşy, häzirki global kynçylyklary çözmegi maksat edinýär
“China Daily” habar gullugynyň habar bermegine görä, Hytaý halkara we sebitleýin çäreleriň birnäçesinde global parahatçylygy, ösüşi, açyklygy we hyzmatdaşlygy mundan beýläk-de ösdürmek üçin meýilnamalaryň we çäreleriň giň toparyny yglan etdi.
Şu esasda Hytaýyň prezidenti Si Szinpin Pekinde geçirilen BRICS işewürler forumynyň açylyş dabarasynda tebigy betbagtçylyklar, ykdysady çökgünlik, azyk we energiýa howpsuzlygy, howpsuzlyk meseleleri, geosyýasy çaknyşyklar we global ösüş ýaly birnäçe global meselä ünsi çekdi.
Ýokary derejeli global ösüş gepleşiklerinde Prezident Si Szinpin, Hytaýyň Günorta-Günorta hyzmatdaşlygy ösdürmek gaznasyny Global Ösüş we Günorta-Günorta Hyzmatdaşlyk Gaznasyna kämilleşdirjekdigini we goşmaça 3 milliard Amerikan dollary bilen üpjün etjekdigini mälim etdi.
Hytaý Halkara gözleg institutynyň prezidenti Su Bu, Hytaýyň "döwrüň soraglaryna" beren jogaplarynyň tutuş adamzat jemgyýetiniň bähbidine, global ösüş temasyna ünsi jemleýändigini, parahatçylygy we durnuklylygy gazanmak üçin tutuş dünýäniň tagallalaryna gönükdirilendigini aýtdy.
Su Bu, häzirki wagtda Hytaýyň Günorta-Günorta hyzmatdaşlygy, “Bir guşak, bir ýol” başlangyjy esasynda halkara ösüşini goldaýan we beýleki ýurtlara BMG-nyň 2030-njy ýyl üçin durnukly ösüş meýilnamasyna ýetmäge kömek edýän işjeň gatnaşýandygyny aýtdy.
“China Daily” habar gullugy, “Bir guşak, bir ýol başlangyjy” taslamasynyň netijesinde Gündogar Afrikada awtoulag ýollarynyň döredilendigini we Hytaý-Ýewropa ýük otlylarynyň dünýä bazarynda durnukly we üznüksiz haryt akymyny üpjün edýändigini habar berýär.
ORIENT news
Surat: www.chinadaily.com.cn
