ORIENT-iň awtory Merkezi Aziýa ýurtlarynyň žurnalistleriniň bäsleşiginde ýeňijileriň hatarynda
Gazagystanda geçirilen Merkezi Aziýa ýurtlarynyň žurnalistleriniň “MediaCAMP AWARD” halkara bäsleşigi duşenbe güni ýeňijileri yglan etdi. Olaryň biri we Türkmenistandan ýeke-täk ýeňiji – ORIENT-iň awtory Aýna Şirowa. Türkmen sungatynda meşhur adamlar - sazandalar, suratkeşler we ýazyjylar hakda adaty bolmadyk ýagdaýda we gyzykly gürrüň bermegi başarýan Aýnanyň materiallary bilen ORIENT-iň okyjylary tanyş.
10-njy oktýabrda bäsleşigiň ýeňijilerini sylaglamak dabarasynda "OPERAtiw işgärler Zarudinler we olaryň aýdym aýdýan şägirtler topary" atly makalasy üçin Aýna Şirowa "Döretmegiň wagty" nominasiýasynyň ýeňijisi diýlip yglan edildi.
Bu ýyl MediaCAMP AWARD-a metbugat KHBS-niň žurnalistleri, suratçylar, wideograflar, illýustratorlar we internet kontentiniň awtorlary gatnaşdy. Dürli žanrdaky we formatdaky işler alty nominasiýada (“Iri planda - wagt”, “Ýeňmegiň wagty”, “Döretmegiň wagty”, “Ýaşlaryň wagty”, “Düşünmegiň wagty” we “Ýylyň mowzugy. Täze wagt”) rus, gazak, gyrgyz, täjik, türkmen, özbek dillerinde berildi.
MediaCAMP AWARD bäsleşigi dördünji gezek geçirilýär, oňa ýaş we tejribeli žurnalistler gatnaşýar. Geçen ýyl bu bäsleşige gatnaşanlaryň sany 600-den gowrak boldy, bu ýyl Gazagystandan, Gyrgyzystandan, Täjigistandan, Türkmenistandan we Özbegistandan gatnaşanlaryň sany 821-e ýetdi. Bu festiwalyň geçirilýän döwründe bäsleşige gatnaşanlaryň sanynyň iň ýokary görkezijisidir.
ORIENT
