Aşgabatda gyzgyn aragatnaşyk operatorlary üçin migrasiýa meseleleri boýunça türgenleşik okuwy geçirildi
Birleşen Milletler Guramasynyň Neşe serişdelerine we jenaýatlara garşy göreşmek baradaky Müdirligi (UNODC) USAID-iň «Merkezi Aziýadaky Howpsuz Migrasiýa Maksatnamasy» bilen bilelikde migrasiýa meseleleri boýunça maslahat bermek maksady bilen, Aşgabatda döwlet we jemgyýetçilik gyzgyn aragatnaşyk operatorlarynyň hünärlerini kämilleşdirmeklige gönükdirilen gibrid görnüşinde türgenleşik okuwyny gurady.
Okuw çäresiniň esasy maksady adam söwdasynyň (AS) pidalaryna we bolup biljek psihologiki şikesleri göz öňünde tutup, ýüz tutýanlara maslahat bermekde hünärmenleriň - döwlet edaralarynyň we jemgyýetçilik guramalarynyň gyzgyn aragatnaşyk operatorlarynyň mümkinçiliklerini güýçlendirmekdir.
BMG-niň Neşe serişdelerine we jenaýatlara garşy göreşmek baradaky Müdirliginiň sebit dolandyryjysy jenap Kohen Markweringiň we USAID-iň «Merkezi Aziýadaky Howpsuz Migrasiýa» maksatnamasynyň direktory hanym Eleanor Walentaýnyň çykyşyndan soň, okuw çäresiniň birinji sessiýasy adam söwdasyna garşy döwletiň gyzgyn aragatnaşyk ulgamyny guramagyň amerikan modeline bagyşlandy.
Okuwyň dowamynda ABŞ hem-de Gyrgyzystan we Özbegistan ýaly Merkezi Aziýa ýurtlarynyň gyzgyn aragatnaşygynyň modelleri görkezildi. Okuw çäresine gatnaşanlar dürli ýurtlaryň gyzgyn aragatnaşyklarynyň gurluşy we işleýşi, gelýän jaňlaryň görnüşleri, adam söwdasynyň ýagdaýlaryna baha bermek, maglumatlary dolandyrmak we seljermek we ugrukdyrmak ýaly işler bilen tanyşdylar.
Okuwa gatnaşanlaryň adam söwdasy we migrantlaryň bikanun getirilmegi, şeýle hem bu mesele boýunça milli we sebitleýin özgertmeler baradaky umumy bilimlerini çuňlaşdyrmakdan başga, birnäçe öňdebaryjy tejribeleri açyp, gyzgyn aragatnaşyga gatnaşýanlaryň esasy başarnyklaryny üstünlikli kämilleşdirdiler.
ORIENT news
