Türkmen wekiliýeti Halkara Elektroaragatnaşyk Birleşiginiň maslahatynyň açylyşyna gatnaşýar
Türkmen wekiliýeti Rumyniýanyň Buharest şäherinde Halkara Elektroaragatnaşyk Birleşiginiň (HEB) maslahatynyň açylyşyna gatnaşdy. Bu ýerde guramanyň täze ýolbaşçysy Dorin Bogdan-Martin saýlandy diýip, HEB-niň saýty habar berýär.
Türkmenistanyň Rumyniýadaky diplomatik wekilhanasynyň işgärlerinden ybarat bolan iş topary duşuşykda elektroaragatnaşyk ulgamynda öňde duran ilkinji nobatdaky wezipeleri ara alyp maslahatlaşar.
HEB-niň täze saýlanan baştutany eden çykyşynda Ýer ýüzüniň ilatynyň internete bolan elýeterliligini üpjün etmegiň möhümdigini belledi. Häzirki günde 2,7 millard adamyň internete elýeterliligi ýok. Ol sanlylaşdyrmak işini hem-de BMG-niň Durnukly ösüş maksatlaryna ýetmek baradaky ýörelgäni dowam etjekdigini aýtdy.
Wekilçilikli maslahat-2022 14-nji oktýabra çenli dowam eder. Onda dünýä derejeli elektroaragatnaşyk we maglumat-komminikasion tehnologiýalar bilen baglanyşykly wajyp meseleler ara alnyp maslahatlaşylar. Bu BMG-niň sanlylaşdyrmak ulgamyndaky iri bölümçesi bolup, ol dört ýyldan bir gezek Birleşigiň Prezidiumyny döretmek we geljek 4 ýyl üçin onuň strategik ösüş meýilnamalaryny işläp taýýarlamak maksady bilen çagyrylýar.
ORIENT news
Foto: twitter.com \ @ITUSecGen
