Türkmenistan azyk howpsuzlygy boýunça halkara forumyny geçirmäge taýýar
Türkmenistanyň BMG-daky Hemişelik wekili Aksoltan Ataýewa 26-njy sentýabrda Nýu-Yorkda BMG-nyň Baş Assambleýasynyň 77-nji mejlisiniň umumy çekişmesinde çykyş etdi.
Ol gapma-garşylyklary we düşünişmezlikleri çözmegiň ýeke-täk usuly diýip gepleşikleri belläp geçdi, hem-de ykdysady we gumanitar gatnaşyklary dikeltmäge çagyrdy.
– Birleşen Milletler Guramasyna hiç hili alternatiwa ýok, – diýip, bellemek bilen, Ataýewa howpsuzlygyň bütndünýä binagärliginiň çynlakaý synaglary başdan geçirýändigini duýdurdy. Köptaraplaýyn hyzmatdaşlyga päsgel berýän çylşyrymly proseslere ünsi çekip, ol gepleşikler üçin bar bolan platformalary berkitmegiň we derwaýys global meseleler boýunça hökümetara gepleşikler üçin täzelerini döretmegi göz öňünde tutmagyň zerurdygyny aýtdy.
Halkara gatnaşyklarynda bir-birege bolan ynama esaslanýan gepleşik pelsepesini mundan beýläk-de ösdürmek üçin Türkmenistanyň wekiliýeti Baş Assambleýa "Dialog - parahatçylygyň kepili" atly Rezolýusiýanyň taslamasyny teklip etmegi meýilleşdirýär.
Global azyk howpsuzlygyna abanýan howplar barada alada bildirip, Hemişelik wekil halkara jemgyýetçiligini bütindünýä azyk bazarynyň durnuklylygyny üpjün etmäge we iň ejiz ýurtlary azyk bilen üpjün etmek baradaky çylşyrymly meseläniň çözgütlerini bilelikde gözlemäge çagyrdy. Bu maksat bilen Ataýewa Türkmenistanda azyk howpsuzlygy boýunça halkara forumyny geçirmegi teklip etdi.
Ataýewa Merkezi Aziýada howanyň üýtgemegi we suw bilen baglanyşykly meseleleriň möhüm ähmiýete eýedigini aýtdy we Merkezi Aziýa döwletleri üçin howa tehnologiýalary sebit merkezini döretmäge çagyrdy. Şu nukdaýnazardan, Türkmenistan parnik gazlarynyň zyňyndylaryny azaltmak borjuna ygrarlydygyny ýene bir ýola tassyklady.
COVID-19 infeksiýasyna garşy göreş we lukmançylyk diplomatiýasy üçin gurallary döretmek bilen birlikde, netijeleri utgaşdyrylan tagallalary talap edýän pandemiýa temasy-da gozgaldy.
ORIENT news
Foto: un.org
