Türkmenistanyň Hökümetinde Günorta Uralyň wekiliýeti bilen gepleşikler geçirildi
Günorta Uralyň wekiliýetiniň Aşgabada saparynyň çäklerinde Çelýabinsk oblastynyň gubernatory Alekseý Teksler Türkmenistanyň Hökümetiniň agzalary bilen birnäçe duşuşyklary geçirdi. Onuň ýanynda sebitiň öňdebaryjy kärhanalarynyň ýolbaşçylary bolýar diýip, Çelýabinsk oblastynyň hökümetiniň metbugat-gullugy habar berýär.
Alekseý Teksler ministr, “Türkmengaz” döwlet konserniniň başlygy Batyr Amanow, “Türkmennebit” döwlet konserniniň başlygy Guwanç Agajanow hem-de “Türkmengeologiýa” döwlet korporasiýasynyň başlygy Merdan Rozyýew bilen gepleşikleri geçirdi. Gubernator bilen bilelikde, Turba metallurgiýa kompaniýasynyň, “ÇTPZ” APJ-niň, “MMK” APJ-niň, “Konar” senagat toparynyň, “Ural” awtozawodynyň wekilleri nebitgaz pudagynda hyzmatdaşlyk meselelerini ara alyp maslahatlaşdylar.
Şeýle hem gubernator Türkmenistanyň Ministrler Kabinetiniň Başlygynyň orunbasary Çarymyrat Purçekow, energetika ministri Hajymuhammet Orunow, gurluşyk we binagärlik ministri Guwanç Rejepmyradow hem-de senagat ministri Baýmyrat Annamämmedow bilen duşuşykda Çelýabinsk oblastynyň gurluşykdaky kuwwaty barada gürrüň berdi.
Teksler Ministrler Kabinetiniň Başlygynyň orunbasary Annageldi Ýazmyradow hem-de oba hojalyk we daşky gurşawy goramak ministri Allanur Altyýew bilen oba hojalyk pudagynda hyzmatdaşlyk etmegiň geljegini ara alyp maslahatlaşdy.
“Esasy wezipe – söwda hyzmatdaşlygyny ösdürmek. Şoňa görä-de, şu gün Türkmenistanyň Hökümetinde örän köp duşuşyklar boldy. Biz öz mümkinçiliklerimizi hödürledik hem-de däp boýunça biziň kärhanalarymyzyň güýçli bolan ugurlarynda Türkmenistan tarapyndan örän uly gyzyklanmanyň bardygyny gördük. Munuň özi maşyngurluşyk, metallurgiýa, elektrotehniki önümçilik, oba hojalygynda özara gatnaşyklara degişli meselelerdir. Şu gün Türkmenistanyň her ministrligi tarapyndan we biziň kärhanalarymyzyň wekilleriniň jogapkärleri bilen giňişleýin ara alyp maslahatlaşmalar geçiriler. Ol ýa beýleki önümleri ibermek boýunça anyk ylalaşyklaryň gazanylmagyna umyt edýäris” diýip, Alekseý Teksler aýtdy.
Gubernator hyzmatdaşlyk üçin eýýäm anyk ugurlaryň bardygyny belledi. Mysal üçin, türkmen nebiti gaýtadan işleýän pudagynyň wekilleri Magnitogorsk kombinatynyň hem-de “Konaryň” önümleri bilen gyzyklandylar, “Aşgabat-siti” gurluşyk toplumynda “Modern Glass” kompaniýasynyň täsin aýnapaketleri gerekli bolup biler.
Türkmen tarapy Merkezi Aziýa ýol tehnikasyny getirmek babatda “Ural” awtoulag zawody, ÇTZ, “Ural” DST bilen işlemegiň görnüşlerine garaýar, eýýäm Türkmenistana turba önümlerini satmak barada ylalaşyklar bar.
Şeýle hem saparyň çäklerinde Alekseý Teksleriň Türkmenistanyň Prezidenti Serdar Berdimuhamedow bilen duşuşygy geçirildi.
ORIENT news
