Türkmenistanyň Prezidenti we Tatarstanyň baştutany özara söwda dolanyşygynyň mümkinçiliklerini ara alyp maslahatlaşdylar
Türkmenistanyň Prezidenti Serdar Berdimuhamedow iş sapary bilen Aşgabat şäherine gelen Tatarstanyň baştutany Rustam Minnihanow bilen duşuşdy.
Minnihanow ýurduň sosial-ykdysady ösüşinde ägirt uly üstünlikleri belläp, türkmen liderini we ähli türkmenistanlylary garaşsyzlygyň 31 ýyllygy bilen gutlady, şeýle hem ol Serdar Berdimuhamedowa ikitaraplaýyn hyzmatdaşlygy ösdürmäge berýän goldawy we aýratyn ünsi üçin çuňňur minnetdarlyk bildirdi.
Tatarstanyň Prezidenti geçen ýylyň netijeleri boýunça jemi 77,5 million dollar bolan söwda dolanyşygyny bellemek bilen, Aşgabat bilen Kazanyň arasyndaky söwda-ykdysady hyzmatdaşlyga ýokary baha berdi.
Duşuşykda eksport-import amallaryny artdyrmak mümkinçiligi ara alnyp maslahatlaşyldy. Hususan-da, nebit öndürmek, gaz daşamak, awtoulag, uçar, gämi gurluşygy, himiki önümler bilen üpjün etmek we ş.m. ýaly ugurlarda mümkinçilikler bellendi.
“Tatarstan Respublikasy” onlaýn neşiri hem oktýabr aýynyň ahyrynda Aşgabat we Mary şäherlerinde “Türkmenistanda Tatarstan Respublikasynyň Medeniýet günleriniň” geçiriljekdigini, onuň çäklerinde Wolga Bolgarlary tarapyndan yslamyň kabul edilmeginiň 1100 ýyllygyna bagyşlanan çäreleriň gurnaljakdygyny habar berdi.
Rustam Minnihanow Serdar Berdimuhamedowa Türkmenistanda ýaşaýan tatarlara berýän ünsi we goldawy üçin minnetdarlyk bildirdi.
ORIENT news
