ÝTÖB-nyň çärelerinde telekeçilik üçin hünärmenleri taýýarlamagyň mümkinçilikleri ara alnyp maslahatlaşyldy
Ýewropa Bileleşiginiň maliýe taýdan goldaw bermeginde Ýewropanyň täzeleniş we ösüş banky Aşgabatda işgär gözlegi meselelerine we hususy kompaniýalar üçin hünärmenleri taýýarlamak mümkinçiliklerine bagyşlanan çäreleriň tapgyryny geçirdi.
Duşuşyklaryň maksady Türkmenistanyň bilim merkezleriniň, işgärler agentlikleriniň işewürler bilen ýakyn hyzmatdaşlygynyň, şeýle hem kompaniýalaryň işgär almakda derwaýys zerurlyklaryny çözmäge gönükdirilen ÝTÖB-nyň täze taslamalaryny döretmek mümkinçiliklerini ara alyp maslahatlaşmakdan ybarat.
Tematik tegelek stollar telekeçileri işgärleri taýýarlamak we hünär derejesini ýokarlandyrmak üçin pul we wagt sarp etmegiň zerurlygy, şeýle-de olary nireden gözlemelidigi we nähili esasda topara kabul edilmelidigi barada pikirlenmäge esas berdi.
Duşuşyklarda Türkmenistanyň okuw merkezleriniň bäşisiniň, işgärler agentlikleriniň dördüsiniň we maslahat beriş kompaniýalarynyň ikisiniň ýolbaşçylary we işgärleri çykyş etdiler. Olar hususy pudak üçin ýokary derejeli hünärmenleri taýýarlamagyň mümkinçilikleri, şeýle hem dürli ugurlar boýunça hünärmenleri - buhgalterleri, işgärler bölüminiň işgärlerini we ş.m. işe almagyň kynçylyklary barada jikme-jik gürrüň berdiler.
Häzirkizaman okuw merkezleriniň işiniň ÝOM-nde ýola goýlan okuw tejribesinden düýpgöter tapawutlanýandygyna aýratyn üns berildi. Bu ilkinji nobatda bir kompaniýanyň işgärleriniň hemmesiniň ýa-da bir böleginiň birlikde okap, amaly ýumuşlary bilelikde ýerine ýetirýän korporatiw formatdaky okuwlaryna degişlidir.
Häzirki wagtda işgärleriň iş netijeliligini, hünär derejesini ýokarlandyrmak üçin türkmen kompaniýalary işgärleriň şahsy zerurlyklary göz öňünde tutulan toplumlaýyn maksatnamalary sargyt edip bilerler. Mundan başga-da, okuwlar başlamazdan ozal, okuw merkezleri topardaky hakyky ýagdaýy bilmek üçin öz barlag işlerini geçirerler. Sebäbi, zähmet toparyna öwrenişen ýolbaşçylaryň köplenç halatda işgärleriniň käbir ýetmezçiliklerini gözden salýan bolmagy mümkin, ýöne olar daşyndan gelen garaşsyz synçynyň dessine gözüne iler.
Käbir maslahat beriş kompaniýalary tarapyndan hödürlenýän “Gizlin müşderi” hyzmaty hem edil şonuň ýaly işleýär. Bu hyzmat aýry-aýry işgärler tarapyndan berilýän hyzmatlar boýunça kompaniýanyň gowşak taraplaryny ýüze çykarmaga, şeýle hem müşderiler bilen işleşmek ulgamynyň netijeliligini barlamaga kömek edýär.
ÝTÖB-nyň Türkmenistanyň hususy kompaniýalary, okuw merkezleri we işgärler agentlikleri bilen hyzmatdaşlykda amala aşyryp biljek taslamalarynyň deslapky sanawy aşakdakylary öz içine alýar:
– okuw merkezleri bilen pudaklaýyn birleşikleri döretmek,
– Merkezi Aziýanyň hünärmenleriniň gatnaşmagynda okuwlary guramak,
– hususy kompaniýalar üçin işgärler agentlikleriniň we okuw merkezleriniň sanawyny taýýarlamak,
– kompaniýalarda iş tejribe maksatnamalaryny işläp taýýarlamak,
– hususy kärhanalara ýaşlar üçin ekskursiýalary we ş.m. guramak.
Eziz ÖWEZOW
