Türkmenistanyň Prezidenti HHR-nyň hökümetiniň ýörite wekilini kabul etdi
Türkmenistanyň Prezidenti Serdar Berdimuhamedow çarşenbe güni Hytaý hökümetiniň Ýewraziýa meseleleri boýunça ýörite wekili Li Hueýi kabul etdi.
Diplomat duşuşygyň başynda Hytaý Halk Respublikasynyň Başlygy Si Szinpiniň we Döwlet Geňeşiniň Premýer-ministrii Li Kesýanyň türkmen liderine ugradan salamyny gowşurdy. Serdar Berdimuhamedow muňa jogap edip, Hytaýyň ýolbaşçylaryna gowy arzuwlar bilen ýüzlendi. Şeýle hem, ol Syçuan ýertitremesinde ejir çekenlere gynanç bildirdi. Duşuşyk barada Türkmenistanyň TR we K baradaky DK-niň habarlar gepleşiginiň agşamky sanynda habar berildi.
Soňra taraplar ikitaraplaýyn gün tertibi boýunça pikir alyşdylar. Prezident Hytaýyň dünýäde Türkmenistanyň diplomatik gatnaşyklaryny guran ilkinji ýurtdydygyny aýtdy. Soňky 30 ýylda bu gatnaşyklar iki ýurduň liderleriniň syýasy erki sebäpli, strategik derejä ýetdi.
Häzirki wagtda bu hyzmatdaşlyk ikitaraplaýyn we köptaraplaýyn formatda, şol sanda “Merkezi Aziýa-Hytaý” dialogy boýunça hem depginli ösýär. Iki ýurt hem BMG-nyň we beýleki halkara guramalarynyň platformasynda birek-biregiň başlangyçlaryny goldaýar.
Serdar Berdimuhamedow we Li Hueý taryhy gatnaşyklarynyň başy Beýik Ýüpek ýolundan gaýdýan Türkmenistan bilen Hytaýyň arasyndaky hyzmatdaşlygyň uly geljeginiň bardygyny biragyzdan bellediler.
– Häzirki wagtda Hytaý Türkmenistanyň esasy söwda we ykdysady hyzmatdaşydyr we bu gatnaşyklary giňeltmek üçin ähli mümkinçilikler bar, bu ýerde Türkmen-hytaý hyzmatdaşlyk komiteti möhüm orna eýedir – diýip, Serdar Berdimuhamedow aýtdy.
Adatça ileri tutulýan umumy gyzyklanmalaryň çägine girýän ýangyç-energetika toplumyndan başga-da, ulag-aragatnaşyk pudagy, himiýa senagaty, dokma senagaty, ýokary tehnologiýalar, şeýle hem maýa goýum gatnaşyklary hyzmatdaşlygyň esasy ugurlarynyň arasynda bellendi.
Hytaý Halk Respublikasynyň ýörite wekili Türkmenistanyň Milli Geňeşiniň Başlygy Gurbanguly Berdimuhamedowyň türkmen-hytaý gatnaşyklaryny täze basgançaga çykarmakdaky tagallalaryny belläp, Si Szinpiniň Halk Maslahatynyň başlygyna gyzgyn salam iberendigini aýtdy.
ORIENT news
