Aşgabat prosessine gatnaşan ministrleriň Jemleýji beýannamasy kabul edildi
2022-nji ýylyň 15-nji we 16-njy awgustynda Awazada geçirilen deňze çykalgasy bolmadyk ösüp barýan ýurtlaryň ulag ministrleriniň derejesindäki halkara maslahat Jemleýji beýannamanyň kabul edilmegi bilen tamamlandy.
Forumyň jemleýji mejlisini wise-premýer, Türkmenistanyň Daşary işler ministri Raşid Meredow geçirdi. Ol maslahatyň iki günlük işini, onuň netijelerini we meýilleşdirilen kararlary, tematik bölümleriň çägindäki pikir alyşmalary we çekişmeleri, ministrleriň eden çykyşlaryny umumylaşdyryp, jemledi we şonuň netijesinde jemleýji resminama taýýar edildi.
Meredow bu resminama barada durup geçip, beýannamanyň COVID-19 pandemiýasyndan soň deňze çykalgasy bolmadyk ýurtlaryň durnukly dikeldilmegi üçin ulag aragatnaşygynyň barha artýan ornuna ünsi çekip, bu arabaglanyşygy giňeltmäge we Wena hereket maksatnamasynyň durmuşa geçirilmegini çaltlaşdyrmaga çagyrýandygyny belläp geçdi.
Jemleýji beýannama transport işjeňliginiň pandemiýadan soň bütin dünýä derejesinde dikelip başlandygyna garamazdan, bu işiň henizem gowşakdygyny, deňze çykalgasy bolmadyk ösüp barýan ýurtlaryň yzda galýandygyny tassyklaýar. Şonuň üçin bölünip berlen serişdeler durnukly ulag infrastrukturasynyň ösüşine öz öňyn täsirini mese-mälim ýetirip biler.
Resminama geçelgeleri we sebit aragatnaşygyny, toplumlaýyn multimodal ulag ulgamlaryny we bökdençsiz ulag we söwda baglanyşyklaryny ösdürmäge çagyrýar.
Jemleýji beýannama deňze çykalgasy bolmadyk ýurtlaryň has gowy aragatnaşygyny gazanmak üçin, ähli gyzyklanma bildirýän taraplar bilen hyzmatdaşlygy güýçlendirmegiň, howanyň üýtgemeginiň üstaşyr, söwda üpjünçiligini bozup biljekdigini göz öňünde tutup, bu döwletleriň CO2 zyňyndylary pes bolan energiýa çeşmelerine we tehnologiýalaryna geçmegine ýardam etmegiň möhümdigini görkezýär.
Beýannama deňze çykalgasy bolmadyk ösüp barýan ýurtlardaky taslamalar üçin maýa goýumlaryny we maliýeleşdirmegi dürli çeşmeleriň hasabyna köpeltmäge çagyrýar we Aşgabat prosesiniň çäginde yzygiderli ýokary derejeli duşuşyklaryň, köptaraplaýyn geňeşmeleriň, ynam dörediji we okuw çäreleriniň ähmiýetini belleýär.
Şeýle hem, beýannama deňze çykalgasy bolmadyk ösüp barýan üstaşyr ýurtlary 2024-nji ýylda ýokary derejede geçiriljek deňze çykalgasy bolmadyk ösüp barýan ýurtlar boýunça BMG-nyň üçünji maslahatyna taýýarlyk işlerine we maslahata işjeň gatnaşmaga çagyrýar.
Resminamanyň mazmuny bilen şu ýerde doly tanyşmak bolar.
ORIENT news
