Türkmenistan ulag hyzmatdaşlygyny ösdürmek maksady bilen daşary ýurtly hyzmatdaşlar bilen resminamalara gol çekdi
Türkmenistan Awazada deňze çykalgasy bolmadyk ösüp barýan ýurtlaryň ulag ministrleri derejesindäki maslahatyň çäginde ulag hyzmatdaşlygyny ösdürmek maksady bilen daşary ýurtly hyzmatdaşlarynyň birnäçesi bilen hyzmatdaşlyk baradaky resminamalara gol çekdi.
Türkmenistanyň Ministrler Kabinetiniň ýanyndaky Ulag we kommunikasiýalar agentliginiň Baş direktory Mämmethan Çakyýew we Russiýa Federasiýasynyň Ulag ministri Witaliý Sawelýew halkara awtoulag ýollaryny ösdürmek boýunça ýolbaşçylyk edýän düzümleriniň arasynda özara düşünişmek hakynda Ähtnama gol çekdiler.
Türkmenistan bilen Moldowa Respublikasynyň hökümetleriniň arasynda halkara ýol ulaglary baradaky ylalaşyk baglaşyldy. Moldowa tarapdan resminama ýurduň premýer-ministriniň orunbasary, infrastruktura we sebit ösüş ministri Andreý Spynu gol çekdi.
Türkmenistanyň deňiz we derýa ýollary agentliginiň başlygy Annadurdy Kösäýew we Gruziýanyň Daşary işler ministriniň orunbasary Aleksandr Hwtisiaşwili iki ýurduň deňiz transport agentlikleriniň arasynda özara düşünişmek hakyndaky Ähtnama gol çekdiler.
ORIENT news
