Awazada halkara ýaryşlaryň türkmenistanly ýeňijilerini hormatlamak dabarasy geçirildi
Hepdäniň çarşenbe güni “Awaza” milli syýahatçylyk zolagynda iri halkara ýaryşlarynda — Russiýada geçirilen “Ýüpek ýoly — 2022” ralli-reýdinde we Daşkent şäherinde geçirilen ýetginjekleriň we ýaşlaryň arasynda agyr atletika boýunça Aziýa çempionatynda baýrakly orunlary eýelän türkmen türgenlerini sylaglamak dabarasy boldy.
Abraýly ýaryşlarda Türkmenistana mynasyp wekilçilik eden türgenlere döwlet baştutanynyň adyndan gymmatly sowgatlar gowşuryldy. “Awaza” sport toplumynda geçirilen dabara Prezident Serdar Berdimuhamedowyň ýeňijilere iberen Gutlagy bilen başlandy.
Döwlet baştutany türkmenistanly türgenleriň geljekde dünýä arenasynda gazanjak uly ýeňişlerine ynam bildirip, "Biz ýurdumyzy halkara ýaryşlarynyň, çempionatlaryň we Olimpiýa oýunlarynyň geçirilýän merkezine öwüreris" - diýdi.
Şeýle hem, Prezident gutlag hatynda Türkmenistanyň sport mümkinçiliklerini parahatçylyk we dostluk ideallarynyň dabaralanmasyna gönükdirip, doganlyk we raýdaşlyk däplerini dowam etdirmek bilen, halkara jemgyýetçiliginiň ösüşiniň we bütin dünýäde parahatçylygyň bähbitlerine gönükdirilen syýasaty durmuşa geçirýändigini nygtap geçdi.
Türkmen agyr atletikaçylary, ozal habar berlişi ýaly, sportuň şu görnüşi boýunça Daşkende geçirilen Aziýa çempionatynda üstünlikli çykyş etdiler, oňa ýigrimiden gowrak ýurtdan iň güýçli türgenler gatnaşdy.
Türkmenistanyň agyr atletika boýunça milli ýygyndy toparynyň agzasy, aşgabatly ýokary synp mekdep okuwçysy Medine Amanowa sowgatlaryny geçen ýyl Tokioda geçirilen Olimpiýa oýunlarynda kümüş medala mynasyp bolan Polina Gurýewa gowşurdy,
Medinäniň milli ýygyndydaky “kärdeşi” Saparly Muhyýewe bolsa gymmat bahaly sowgatlary 2018-nji ýylda Aşgabatda geçirilen dünýä çempionatynda altyn medala mynasyp bolan Ýulduz Jumabaýewa gowşurdy.
Nissan Patrol awtoulagynda Astrahan — Moskwa ugry boýunça “Ýüpek ýoly — 2022” atly halkara ralli-reýd ýaryşyna gatnaşan Merdan we Şöhrat Toýlyýewlere, ýeňijilere gowşurylan umumy sowgatlardan başga-da, ýörite baýrak hökmünde — sport awtoulagy sowgat berildi.
2018-nji ýylda Türkmenistanda uly üstünliklere beslenip geçirilen "Amul-Hazar" halkara awtorallisiniň we agyr atletika boýunça dünýä çempionatynyň ýurdumyzda sportuň bu görnüşleriniň ösüşine itergi berendigini we olaryň türkmenistanly wekilleriniň halkara derejesine çykmagyna goşant goşandygyny aýtmalydyrys.
ORIENT news
