Türkmenistanyň Prezidenti ýakynda boljak wakalary habar berdi
Türkmenistanyň ýolbaşçylary 1-nji awgustdan zähmet rugsadynda bolýarlar, ýöne Prezident Serdar Berdimuhamedow hökümetiň geçen mejlisinde awgust aýynda ýurdumyzda birnäçe ähmiýetli wakalaryň boljakdygyny aýtdy.
1-nji awgustda Awazada uly kottejler toplumynyň açylyş dabarasy geçiriler.
3-nji awgustda bolsa Awazada “Ýüpek ýoly-2022” ralli ýaryşynyň hem-de ýetginjekleriň we ýaşlaryň arasynda geçirilen agyr atletika boýunça Aziýa çempionatynyň baýrak eýelerini sylaglamak dabarasy bolar.
Hormatly Prezidentimiz Parlamentiň Başlygy Gülşat Mämmedowa 5-nji awgustda Balkan welaýatynyň Esenguly etrabynda çagalar üçin bina edilen dynç alyş merkeziniň açylyş dabarasyna gatnaşmagy tabşyrdy.
8-nji awgustda bolsa, Prezident Serdar Berdimuhamedowyň habar berişi ýaly, Balkan welaýatynyň şol etrabynda “Demirgazyk-Günorta” halkara ulag geçelgesiniň möhüm halkasyna öwrüljek Garabogazköl aýlagynyň üstünden guruljak köpriniň düýbi tutular.
15-16-njy awgustda bolsa Awazada deňze çykalgasy bolmadyk ösüp barýan ýurtlaryň ulag ministrleriniň derejesinde halkara maslahat geçiriler.
Mundan başga-da, döwlet Baştutanymyz goranmak ministri, döwlet howpsuzlyk geňeşiniň sekretary Begenç Gündogdyýewe hem-de harby we hukuk goraýjy edaralaryň ýolbaşçylaryna Türkmenistanyň Garaşsyzlygynyň nobatdaky sene ýylyna bagyşlanan çäreleriň ýokary derejede taýýarlanylmagyny hem-de geçirilmegini üpjün etmek barada görkezme berdi.
ORIENT news
