Türkmenistanda kärhanany hasaba almak üçin ony esaslandyryjydan artykmaç resminamalary talap etmek gadagan edildi
Türkmen kanunçylygyna girizilen täze üýtgetme kärhana bellige alnanda artykmaç resminamalary talap etmekligi gönüden-göni gadagan etdi.
“Kärhanalar hakynda” Türkmenistanyň Kanunynyň 17-nji maddasy aşakdaky mazmunly bölüm bilen dolduryldy: “4. Kärhananyň döwlet tarapyndan bellige alynmagy üçin şu maddanyň birinji bölüminde göz öňünde tutulan resminamalardan başga, beýleki goşmaça resminamalary talap etmek gadagan.
Ýene bir üýtgetmede – kärhananyň döwlet tarapyndan hasaba alynmagy üçin telekeçiler düşnüksiz “esaslandyryş resminamalaryny” däl-de, anyk bir resminamany - “Kärhananyň Tertipnamasyny” tabşyrmaly - diýilýär.
Şeýlelik bilen, Türkmenistanda kärhanany hasaba almak üçin ony esaslandyryjy diňe aşakdaky resminamalary bermeli:
– esaslandyryjynyň ýa-da esaslandyryjylaryň arzasy,
– kärhananyň Tertipnamasy,
– döwlet belligi üçin alnan ýygymyň tölenendigini tassyklaýan resminama,
– kärhananyň esaslandyryş şertnamasy (esaslandyryjy birden köp bolsa).
Şeýle hem, kärhanalary hasaba almak işi Türkmenistanyň Maliýe we ykdysadyýet ministrliginiň Salgyt müdiriýetine we onuň salgyt gulluklaryna tabşyryldy. Bu bolsa, hasaba alyş tertibinden artykmaç nogsanlyklary aýryp, ony ýönekeýleşdirer.
Üýtgetmeler 2023-nji ýylyň 1-nji ýanwaryndan güýje girer.
Geçen ýyl Türkmenistanda kärhanany döwlet belligine almak hakynda karar kabul etmegiň möhleti iki hepdeden üç iş güne çenli azaldylypdy.
ORIENT news
