Serdar Berdimuhamedow Şawkat Mirziýoýewi 65 ýaşynyň dolmagy bilen gutlady
Türkmenistanyň Prezidenti Serdar Berdimuhamedow özbek kärdeşi Şawkat Mirziýoýewi doglan güni – 65 ýaşynyň dolmagy bilen gutlady.
Türkmen Lideri şu mynasybetli gutlag hatynda “Özbegistanyň döwrüň wajyp meselelerini çözmekde möhüm orun eýeleýändigini hem-de köpsanly ýurtlar bilen açyk we oňyn gatnaşyklary saklaýandygyny” belledi.
Türkmenistanyň we Özbegistanyň hoşniýetli goňşuçylyk, hormat goýmak hem-de özara goldaw bermek ýörelgelerine esaslanan depginli we nitijeli aragatnaşyklary ýola goýuldy diýip, Serdar Berdimuhamedow nygtady. Özbegistan biziň ýakyn hem-de ygtybarly goňşymyzdyr diýlip, türkmen döwlet teleradio ýaýlymlarynyň täzelikleriniň agşamky goýberilişinde beýan edilen gutlagda aýdylýar.
Munuň aýdyň mysaly hökmünde Serdar Berdimuhamedowyň ýakynda Özbegistana bolan ilkinji döwlet saparynyň barşynda geçirilen duşuşyklary we gepleşikleri hem-de gol çekilen resminamalaryň uly toplumyny agzap bolar.
Türkmenistanyň Prezidenti iki ýurduň arasyndaky däp bolan doganlyk gatnaşyklarynyň halklaryň bähbidine ösdüriljekdigine we berkidiljekdigine ynam bildirdi hem-de doglan güni bolan özbek kärdeşine saglyk, bagtyýarlyk we işlerinde üstünlikleri arzuw etdi
Şeýle hem ýekşenbe güni türkmen Parlamentiniň ýokary palatasynyň Başlygy Gurbanguly Berdimuhamedowyň Özbegistanyň Prezidenti bilen telefon arkaly söhbetdeşligi geçirildi.
Halk maslahatynyň Başlygy Şawkat Mirziýoýewi 65 ýaşynyň dolmagy bilen gutlady hem-de döwlet ara gatnaşyklaryň ýetilen derejesine ýokary baha berip, şol gatnaşyklaryň pugtalandyrylmagyna Özbegistanyň Baştutanyň berýän aýratyn ünsüni we şahsy goşandyny belledi.
Söhbetdeşligiň dowamynda häzir türkmen-özbek söwda-ykdysady, medeni-ynsanperwer aragatnaşyklarynyň okgunly ösdürilýändigi, döwrüň umumy möhüm wezipeleriniň çözülmegine iki ýurduň çemeleşmeleriniň ýakyn bolmagyna ýardam edýän parlamentara gatnaşyklarynyň işjeňleşdirilýändigi bellenildi.
ORIENT news
