Serdar Berdimuhamedow MA sebitiniň howpsuzlygynyň esasy wehimlerini atlandyrdy
Türkmenistanyň Prezidenti Serdar Berdimuhamedow penşenbe güni Gyrgyzystanyň Çolpon-Ata şäherinde Merkezi Aziýanyň döwlet Baştutanlarynyň sammitinde sebitdäki howpsuzlygyň esasy wehimlerini atlandyrdy.
Türkmen Lideri şu görnüşde geçirilen soňky duşuşykdan bäri geçen bir ýylda dünýäniň görnetin üýtgändigini, täze ýagdaýlaryň we çagyryşlaryň Merkezi Aziýa hem degendigini, bu ýerde howpsuzlygy üpjün etmek meselesiniň ýitileşendigini belledi.
Serdar Berdimuhamedow esasy wehimleriň hatarynda sebitiň ýurtlarynda içerki syýasy durnuklylygy bozmaga synanyşyklary, şeýle hem Merkezi Aziýa ekstremistik hem-de radikal ýagdaýalaryň aralaşmak synanyşyklaryny belläp geçdi.
Biziň serhetlerimize ýakynlykda bolup geçýän harby-syýasy gapma-garşylyklaryň mümkin bolan ýaramaz täsiri Merkezi Aziýanyň gapma-garşylykly hereketleriň meýdançasyna öwrülmezligi üçin bizden goranmak serişdelerini döretmegi talap edýär diýip, Türkmenistanyň Prezidenti aýtdy.
Şunuň bilen birlikde, ol MA sebitiniň öz içindäki gapma-garşylyklara getirip bilýän ýagdaýlary howpsuzlyga abanýan wehimleriň hataryna goşdy.
Şeýle hem kiberjenaýatçylyk, maglumat tehnologiýalaryndan hyýanatçylykly peýdalanmak, daşary ýurtlardan sebitiň halklarynyň däp-dessurlaryna, milli gymmatlyklaryna laýyk gelmeýän maksatlary we meýilleri ýaýratmak howp döredýär diýip, Serdar Berdimuhamedow nygtady.
Türkmenistanyň Baştutanynyň pikirine görä, Merkezi Aziýany parahatçylygyň we rowaçlygyň töwekgelçilikleriniň täsirine düşmeýän durnuklylygyň hem-de ynanyşmagyň çägi hökmünde gorap saklamak üçin sebitiň berk we bölünmez howpsuzlyk ulgamyny döredip bu wehimlere garşy bilelikde agzybirlik hem ynam bilen hereket etmek zerurdyr.
ORIENT news
