Türkmenistanyň we Gyrgyzystanyň Prezidentleri Çolpon-Atada duşuşdylar
– Merkezi Aziýanyň döwlet baştutanlarynyň sammitine gatnaşmak üçin Gyrgyzystana gelen Türkmenistanyň Prezidenti Serdar Berdimuhamedow Respublikanyň lideri Sadyr Japarow bilen Çolpon-Ata şäherinde duşuşdy – diýip, Gyrgyzystanyň döwlet baştutanynyň metbugat gullugy habar berýär.
Duşuşykda Sadyr Japarow Gyrgyzystan bilen Türkmenistanyň ýakyn dost we strategik hyzmatdaşdygyny, gyrgyz tarapynyň resmi Aşgabat bilen söwda-ykdysady gatnaşyklarynyň giňelmegine we hil taýdan ösmegine uly ähmiýet berýändigini aýtdy.
Serdar Berdimuhamedow mähirli garşylanandygy üçin Gyrgyzystan tarapyna minnetdarlyk bildirdi we Türkmenistanyň Gyrgyzystan bilen özara gyzyklanma bildirilýän ähli ugurlar boýunça netijeli hyzmatdaşlygyny dowam etdirmäge taýýardygyny aýtdy.
Şeýle hem, türkmen lideri şu gün Merkezi Aziýanyň döwlet baştutanlarynyň duşuşygynda gol çekilmegi meýilleşdirilýän resminamalaryň sebitiň ýurtlarynyň arasyndaky hyzmatdaşlygyň giňelmegine we çuňlaşmagyna goşant goşjakdygyna ynam bildirdi.
ORIENT news
