Gyrgyzystanda Merkezi Aziýanyň döwlet Baştutanlarynyň duşuşygy geçýär
Gyrgyzystanyň Çolpon-Ata şäherinde Merkezi Aziýa ýurtlarynyň Prezidentleri Konsultatiw duşuşyk geçirýärler diýip, ýerli köpçülikleýin habar beriş serişdeleri habar berýärler. Resmi salamlaşma dabarasyndan soň, giňişleýin görnüşde mejlis başlandy.
Gyrgyzystanyň Baştutany Sadyr Žaparow sammite gatnaşyjylary mübärekläp, Türkmenistanyň Prezidenti Serdar Berdimuhamedowa ýüzlendi:
– Hormatly Serdar Gurbangulyýewiç, şu gün Siz ilkinji gezek Konsultatiw duşuşyga gatnaşýarsyňyz. Siziň hormatly Gurbanguly Mälikgulyýewiçiň işni dowam etdirjekdigiňize hem-de Merkezi Aziýada jebisleşmek we maksatlary utgaşykly ýerine ýetirmek işine öz goşandyňyzy goşjakdygyňyza ynanýaryn. Pursatdan peýdalanyp, Türkmenistanyň gülläp ösmegi ugrunda alyp barýan işiňizde Size uly üstünlikleri we rowaçlyklary arzuw edýärin -diýip, Žaparow aýtdy.
Duşuşygyň dowamynda Merkezi Aziýa döwletleriniň Baştutanlarynyň hyzmatdaşlygy berkitmek, sebit howpsuzlygyna abanýan wehimlere we çagyryşlara garşy bilelikde göreşmek barada pikir alyşmaklaryna garaşylýar.
Şeýle hem sebitdäki döwletleriň durnukly ykdysady ösüşini üpjün etmek üçin hyzmatdaşlygy giňeltmegiň geljegi ara alnyp maslahatlaşylar. Duşuşygyň netijeleri boýunça birnäçe resminamalara gol çekmek meýilleşdirilýär.
ORIENT news
