Serdar Berdimuhamedow Şawkat Mirziýoýewi jogap sapary bilen Türkmenistana gelmäge çagyrdy
Türkmenistanyň Prezidenti Serdar Berdimuhamedow ikiçäk gepleşikleriň çäklerinde Özbegistanyň baştutanyny özi üçin islendik amatly wagtda jogap sapary bilen Türkmenistana gelmäge çagyrdy diýip, özbek lideriniň metbugat gullugy habar berýär.
Goňşy döwletleriň Baştutanlary sebitara hyzmatdaşlygyny ýola goýmak üçin uly mümkinçilikleriň bardygyny bellediler, halkara gün tertibine degişli meseleleri ara alyp maslahatlaşdylar hem-de Merkezi Aziýada ynanyşmak we hoşniýetli goňşuçylyk ýagdaýyny berkitmegiň möhümdigini aýratyn nygtadylar.
Serdar Berdimuhamedow häzirki döwlet saparynyň Türkmenistan bilen Özbegistanyň arasyndaky strategik hyzmatdaşlyga täze itergi bermäge gönükdirilendigini belledi.
Şawkat Mirziýoýew Türkmenistany Özbegistanyň sebitdäki ygtybarly we möhüm hyzmatdaşy diýip atlandyrdy. “Biz doly möçberli hyzmatdaşlygy mundan beýläk-de ösdürmäge ygrarlydyrys, iň ýakyn goňşymyz bilen strategik hyzmatdaşlyk gatnaşyklaryny hemmetaraplaýyn pugtalandyrmagy maksat edinýäris” diýip, özbek lideri belledi.
Ikiçäk gepleşikleriň dowamynda taraplar türkmen-özbek hyzmatdaşlygynyň geljegini ara alyp maslahatlaşyp, söwda-ykdysady aragatnaşyklaryň ösdürilmegine, özara söwdanyň artdyrylmagyna, bilelikdäki senagat taslamalarynyň durmuşa geçirilmegine, ulag-üstaşyr mümkinçilikleriň ulanylmagyna aýratyn üns berdiler.
ORIENT news
