Aşgabatda halkara ulag geçelgeleri boýunça birnäçe iş duşuşyklary geçiriler
Paýtagtymyzda Türkmenistanyň, Özbegistanyň, Eýranyň, Kataryň we Omanyň hökümetleriniň arasynda bu ýurtalaryň arasynda ulag geçelgesini döretmek hakynda ylalaşyk boýunça iş toparynyň nobatdaky mejlisi geçiriler.
Mundan başga-da, Täjigistan-Özbegistan-Türkmenistan-Eýran-Türkiýe hem-de Gyrgyzystan-Özbegistan-Türkmenistan-Eýran ulag geçelgeleri boýunça iş duşuşygy bolar.
Bular barada çarşenbe güni Ministrler Kabinetiniň mejlisiniň dowamynda Türkmenistanyň Hökümetiniň ýanyndaky Ulag-kommunikasiýa agentliginiň Baş direktory Mämmethan Çakyýew hormatly Prezidentimiz Serdar Berdimuhamedowa hasabat berdi.
Iş toparlarynyň mejlisleri 18-19-njy iýulda Türkmenistanyň Söwda-senagat edarasynda geçiriljek “Halkara ulag-üstaşyr geçelgeleri: özara arabaglanyşyk we ösüş” atly halkara maslahatynyň çäklerinde geçirilmegi meýilleşdirildi.
Ozal ORIENT halkara forumynyň dowamynda ulag-aragatnaşyk pudagyny ösdürmekde ylym-bilim ulgamynyň eýeleýän orny, pudagy sanly ulgama geçirmek, durnukly ulag ulgamynyň ekologiýa ugurlary ýaly wajyp meselelere we beýlekilere garaljakdygyny habar beripdi.
ORIENT news
