Sambo boýunça dünýä çempionaty 2025-nji ýylyň noýabrynda Aşgabatda geçiriler
Çarşenbe güni Türkmenistanyň Prezidenti karara gol çekdi, resminama laýyklykda, Sport we ýaşlar syýasaty ministrligi Halkara sambo federasiýasy bilen bilelikde, Aşgabatda sambo boýunça dünýä çempionatyny geçirerler. Ýaryşlar 2025-nji ýylyň noýabr aýynda Olimpiýa şäherjiginiň söweş sungatlary sport toplumynda geçiriler.
Şeýle hem resminama bilen sambo boýunça DÇ-25-iň guramaçylyk komiteti döredildi hem-de terjimeçiler hökmünde türkmen ýokary okuw mekdepleriniň talyplaryny meýletinçileriň işine çekmek tabşyryldy.
Iri sport forumynyň geçirilmegi halklaryň arasynda dostlukly we hoşniýetli goňşuçylyk gatnaşyklaryny mundan beýläkde pugtalandyrmaga, bedenterbiýäni we sporty, sagdyn durmuş ýörelgelerini wagyz etmäge, ýaş nesilleri sport bilen meşgullanmaga giňden çekmäge, Türkmenistanyň sport dünýäsindäki halkara abraýyny ýokarlandyrmaga gönükdirilendir diýlip, türkmen döwlet tele-radio ýaýlymlarynyň täzelikleriniň agşamky goýberilişinde halka ýetirilen kararda aýdylýar.
Türkmenistan sambo boýunça dünýä çempionatyny 2020-nji ýylda geçirmegi meýilleşdirýärdi, ýöne pandemiýa ýagdaýlary sebäpli, Halkara sambo federasiýasy onuň geçiriljek senesini üýtgetmek hakynda çözgüt kabul edipdi.
ORIENT news
