Putin Tähranda geçiriljek sammitde Raisi we Ärdogan bilen duşuşar
– Russiýanyň Prezidenti Wladimir Putin 19-njy iýulda Tährana barar we şol ýerde eýranly kärdeşi Ebrahim Raisi we Türkiýäniň lideri Rejep Taýyp Ärdogan bilen üçtaraplaýyn sammite gatnaşar – diýip, Kremliň metbugat sekretary Dmitriý Peskow aýtdy. Russiýa Federasiýasynyň baştutany şeýle-de birnäçe ikitaraplaýyn duşuşyklary geçirer – diýip, RIA Nowosti habar berýär.
– Hawa, biz muny tassyklap bileris. Hakykatdanam, Prezidentiň Tährana sapary taýýarlanýar. Ol ýerde Astana prosesini kepillendiriji döwletleriň baştutanlarynyň duşuşygy bolar. Bilşiňiz ýaly, bu Siriýadaky ýagdaýy kadalaşdyrmaga ýardam bermäge gönükdirilendir – diýip, Peskow aýtdy.
Putiniň ýakyn wagtda boljak saparyny eýran tarapy hem tassyklady. Eýran Mejlisiniň ykdysady komissiýasynyň başlygy Muhammetreza Pur-Ebrahiminiň aýtmagyna görä, gepleşiklerde Raisiniň ýaňy-ýakynda Moskwa eden saparyndan soň has-da möhüm ähmiýete eýe bolan ykdysady ösüş we hyzmatdaşlyk meseleleri ara alnyp maslahatlaşylar.
Ýakynda, ýagny duşenbe güni Wladimir Putiniň Rejep Taýyp Ärdogan bilen telefon arkaly söhbetdeşligi boldy.
Ýakyn geljekde geçiriljek ýokary derejedäki rus-türk duşuşygynyň öňüsyrasynda liderler ikitaraplaýyn gyzyklanma bildirilýän meseleler toplumyna seredip geçdiler. Ykdysady hyzmatdaşlygy mundan beýläk-de işjeňleşdirmek, şol sanda kanuny esaslaryny kämilleşdirmek, söwda mukdaryny ýokarlandyrmak we hasaplaşyklarda milli walýutalary ulanmak, şeýle hem Russiýanyň energiýa göterijileriniň üznüksiz üpjünçiligini dowam etdirmek meselelerine aýratyn üns berildi – diýlip, Kremliň saýtynda habar berilýär.
ORIENT news
