BMG “ýaşyl” tehnologiýalary özleşdirmekde Türkmenistana kömek bermäge taýýar
Birleşen Milletler Guramasy we onuň Daşky gurşay goramak baradaky maksatnamasy (ÝUNEP) “ýaşyl” tehnologiýalary özleşdirmekde Türkmenistana kömek bermäge hem-de ählumumy derejede energetika geçmegiň häzirki döwründe möhüm ähli ylmy maglumatlara elýeterliligi bermäge taýýardyr.
Bu barada BMG-niň Türkmenistandaky hemişelik utgaşdyryjysy Dmitriý Şlapaçenko Aşgabatda “Uglewodorod serişdelerini gazyp almagyň ekologiýa ugurlary” atly ylmy maslahatyň çäklerinde ORIENT-e beren interwýusynda aýtdy.
– Biz Türkmenistanyň metanyň bölünip çykmagyny ep-esli derejede azaldyp biljek tehnologiýalary bar diýip hasaplaýarys. Biziň maglumatlarymyza görä, eger şolar herekete girizilse, bölünip çykmalar 75% azalar, bu bolsa örän köpdür. Şoňa görä-de, biz üçin BMG bilen Türkmenistanyň arasyndaky netijeli gatnaşyklaryň dowam etmegi wajypdyr – diýip, Şlapaçenko aýtdy.
BMG-niň düzümleri resmi Aşgabadyň metanyň bölünip çykmagy bilen baglanyşykly meseleleri ileri tutulýan derejä çykarmagy hem-de olaryň garşysyna göreşjekdigi barada bir pikirde bolýar diýip, diplomat belledi.
Şlapaçenko Aşgabatdaky şu ekologiýa maslahatynyň guramaçylgy baradaky meselä degip geçip, onuň ýokary derejede geçendigini we üstünlikli bolandygyny nygtady.
– Şeýle çäräniň geçirilmegi, umuman, ekologiýa meselelerinde we hususan-da, metanyň bölünip çykmagy babatda Türkmenistanyň BMG hem-de beýleki halkara hyzmatdaşlar bilen örän açyk işleýändigine şaýatlyk edýär.
ORIENT news
