Türkmenistanyň Prezidenti Lebapda täze gaz ýygnaýjy desgany açdy
Prezident Serdar Berdimuhamedow hepdäniň şenbe güni Lebap welaýatyna sapary amala aşyrdy. Ol ýerde täze gaz ýygnaýjy desgany açmazdan öň, daýhanlar bilen duşuşdy.
Türkmenabat şäheriniň Halkara howa menziline gelen döwlet baştutanyna Lebap welaýatynyň häkimi Şöhrat Amangeldiýew Darganata etrabynyň gallaçylarynyň galla taýýarlamak boýunça şertnamalaýyn borçnamalaryny berjaý edendikleri barada habar berdi.
Prezident howa menzilinden ekerançylyk hojalyklaryna tarap ugrady. Serdar Berdimuhamedow Çärjew etrabynyň “Watan” daýhan birleşiginde kärendeçi Azat Joraýewiň ekin meýdanyna geldi.
Ekerançy bilen söhbetdeşlikde Prezident iş şertleri, gündelik aladalary bilen gyzyklandy. Gallaçy daýhan 16 ýyl bäri kärendeçilik usulynda işleýändigini, häzirki wagtda 10 gektar meýdanyň her gektaryndan 50 sentner hasyla garaşýandygyny aýtdy.
Ol döwlet baştutanyndan öz kärende ýerinde ýetişdiren bugdaýyny ormaga ak pata bermegini haýyş etdi. Prezident “Bismilla” diýip, bugdaýyň bir dessesini ordy. Dessine kuwwatly tehnikalar – CLAAS we John Deere kysymly kombaýnlar işe girişdiler.
Prezident ýerli ekerançylaryň öndürýän oba hojalyk öňümleriniň sergisi bilen tanyşdy, täze hasylyň unundan bişirilen çörekden dadyp gördi, soňra Farap etrabynda gurlan “Gadyn” gaz ýygnaýjy bekede tarap ugrady.
Bu ýerde ýurduň ýolbaşçy düzüminiň we CNPC kompaniýasynyň wekilleriniň gatnaşmagynda gaz senagatynyň täze desgasynyň işe girizilmegi mynasybetli dabaraly çäre geçirildi. Bu taslama CNPC kompaniýasy bilen bilelikde amala aşyryldy.
Ýygnananlaryň öňünde çykyş etmek bilen, Serdar Berdimuhamedow ýurduň alyp barýan “açyk gapylar” syýasatynyň Türkmenistanyň halkara gatnaşyklarynyň möhüm binýady bolup durýandygyny belledi. Gazyň gorlary boýunça dünýäde dördünji orny eýeleýän Türkmenistan uglewodorod serişdeleri bilen daşarky bazarlary esasy üpjün edijileriň biridir.
Döwlet baştutany bu ulgamda HHR bilen bilelikde amala aşyrylýan taslamalaryň möhüm ähmiýete eýedigini belledi. Ýylda 55 milliard kub metr gazy geçirmäge mümkinçilik berýän Türkmenistan-Özbegistan-Gazagystan-Hytaý transmilli gaz geçirijisi muňa aýdyň mysaldyr.
Onuň 2009-njy ýylyň ahyrynda işe girizileninden bäri, Türkmenistandan Hytaýa 334 milliard kub metrden hem köp tebigy gaz iberildi. Geljekde onuň 4-nji şahasyny gurmak bilen gaz geçirijiniň kuwwatyny ýylda 65 milliard kub metre ýetirmek göz öňünde tutulýar.
Täze gurlan “Gadyn” gaz ýygnaýjy bekedi Amyderýanyň sag kenarynda ýerleşýän we HHR ugradylýan türkmen gazynyň çig mal çeşmesi bolup durýan “Bagtyýarlyk” şertnamalaýyn çäginiň “Kiştiwan”, “Günbatar Kiştiwan”, “Gadyn”, “Eljik” we “Gündogar Eljik” känlerinden tebigy gazyň gije-gündizde 5,5 million kub metrini ýygnar.
Serdar Berdimuhamedow düwmäni basyp, önümçiligi işe girizdi.
Wideoşekiller arkaly dabara gatnaşyjylara 200 orunlyk iş ýeri döredilen täze bekediň işi görkezildi.
Soňra Prezident wideoaragatnaşyk arkaly Üçajy-Zergär gaz geçirijisiniň ulanyşa goýberilmegine ak pata berdi. Bu ýerden gaz welaýatyň ýaşaýjylaryny üpjün etmek üçin Çärjew etrabyndaky gazturbinaly elektrik bekedine ugradylar.
ORIENT news
