Türkmenistanyň we Eýranyň Daşary işler ministrleri Tähranda gepleşikleri geçirdiler
– Türkmenistanyň Prezidenti Serdar Berdimuhamedowyň Eýrana resmi saparynyň öňýanynda Tähranda iki ýurduň Daşary işler ministrleri – Raşid Meredow bilen Hoseýn Amir Abdollahiýanyň duşuşygy boldy – diýip, eýran KHBS habar berýär.
Duşuşyk Eýranyň Daşary işler ministrliginde geçdi. DIM-niň baştutanlary ýurtlaryň özara gatnaşyklaryny we ýokary derejede geçiriljek gepleşikleri ara alyp maslahatlaşdylar.
Türkmenistanyň Prezidentiniň Eýrana resmi saparynyň çäklerinde goňşy döwletleriň dürli ulgamlardaky hyzmatdaşlygyny berkitmäge gönükdirilen resminamalar bukjasyna gol çekilmegine garaşylýar.
Bu Serdar Berdimuhamedowyň Prezident wezipesinde amala aşyrýan ikinji resmi daşary ýurt saparydyr. Mundan öň türkmen lideri Russiýada resmi saparda bolup, ol ýerde RF-nyň baştutany Wladimir Putin bilen gepleşikleri geçirdi.
ORIENT news
